TPA dedica una serie de cinco capítulos a ‘L’Horru’

|
'L'Horru' con Ástur Paredes

Esti miércoles va estrenase en TPA ‘L’Horru’, producción cinematográfica en castellanu dividida en cinco capítulos que conduz y dirixe’l periodista Jaime Santos. La serie va dedicar cada día a un sieglu, dende’l XVI hasta anguaño, pa percorrer la historia d’Asturies al traviés d’esta construcción xunto con espertos como Ástur Paredes, Cristina Cantero o Juaco López, ente otros.

La Rebequina y Art&Life son les productores que tán tres esti proyeutu documental que busca tresmitir el “valor testimonial, téunicu y artísticu” del horru, asina como’l so “venceyu sentimental col pueblu que lu diseñó”, informa TPA. Santos, con una autocaravana, va movese per tol país “pa ver cómo se constrúin y cómo se treslladan los horros, la so evolución a lo llargo de los sieglos y la so adaptación constante a les necesidaes de cada época”.

En cada llugar veráse con carpinteros, etnógrafos y historiadores bien conocedores d’esta construcción tan asturiana, acompañando les entrevistes con imáxenes aéres y nocherniegues espectaculares. Asina, nesti primer capítulu, grabáu en Villaviciosa, Grau y Quirós, van apaecer Paredes, Cantero, López, Armando Graña, Xuan Pedrayes y Xune Zapico.

“Una producción que cambiará pa siempre la nuesa forma de mirar y sentir los horros”, promete TPA, que va estrenar la serie documental a les 22.20 hores, depués de ‘El Picu’.

Na semeya, Paredes xunto con Santos nun momentu de la grabación. Imaxe propiedá d'Art & Life.

Contador Estadistiques