Santos: “La solución pa los horros ye l’amor, pero l'amor que vien del conocimientu y el respetu bien entendíu”

TPA emitió recién la serie documental ‘L’horru’, que percorrió la historia d’Asturies dende’l sieglu XVI al traviés d’esta construcción. El periodista Jaime Santos (Uviéu, 1969) presentó y dirixó esta producción de cinco capítulos qu’agora van disfrutar los pasaxeros d’AVE y Alvia con PlayRenfe y que va entrar nel catálogu d’una reconocida plataforma dixital.

‘L’horru’ nun aparó de recibir bones crítiques dende la so estrena. ¿Esperábenlo?

Los horros d’Asturies son un temazu por dellos motivos. Lo primeru que la so hestoria ye desconocida pola mayor parte de la xente, y de los mesmos asturianos, anque pareza una paradoxa. Lo segundo ye la belleza. Los horros son arquitectura clásica entemecía col paisaxe asturianu y a lo llargo de los sieglos, su ornamentación camudó coles corrientes del arte universal, ye decir, son un suxetu increiblemente atractivu pa fotografíar. Pero amás, nel interior, los horros guarden la memoria del país. Trés d’ellos podemos conocer la nuesa hestoria económico y social y per ende a nós mesmos.

La dificultá taba en repasar cinco sieglos de la hestoria d'un edificiu y facelo dinámicu. Afortunadamente nes primeres xornáes de grabación dímonos cuenta qu'el resultáo yera mui bonu y que diéramos cola clave pa contalo.

¿Cómo surdió la idea d’entamar un proyeutu d’esti calter?

Nel 2012, por encargu de Juaco López, fici un documental curtiu, ‘Horros: ayalga y arca’, que tuvo en percorríu bien guapu pero que, con 40 minutos de metraxe, yera insuficiente pa encetar el tema fondamente Mientres el primer confinamientu, na primavera del 2020, cuando me fervía la necesidá de glayar, la Conseyería de Cultura convocó a los creadores pa cuntar el so zarru. Yo alcordeme d’una panera maraviyosa que hai barganal la mio casa que ta fecha en plena pandemia del ‘gripe español’ nel 1919, y dime cuenta que yera el momentu de volver a falar d’horros. Dende TPA la so direutora d’Antena, Lucía Herrera, animóme a facer un programa al “altor del horru asturianu”. Eso son pallabres mayores porque l’horru ye un xigante del arte popular européu y universal.

Lo primero que fici foi buscar un bon realizador, Ruben Castellano (Art&Life), con quien trabayara faciendo ‘En el camino’ pa TPA. Rubén ye de Avilés pero lleva años trabayando en publi y audiovisual con firmes potentes fuera d’Asturies. Como realizador tien un gustu esquisitu y siempres nos entendimos de maravía, daqué que ye bien importante pa min cuando decido volver a poneme delantre la cámara. Con Rubén llegaron dos profesionales más, Dani Arango y Rafa Navarro, autores de la fotografía del programa. Los tres namoraron de los horros de sópitu y el so trabayu lo reflexa porque ye escelente.

Los cinco capítulos fixéronse como una producción cinematográfica, con imáxes espectaculares, na que vusté da voz a numberosos espertos.

Yo quería facer televisión clásica de calidá, como la que vía de guaḥe con Carl Sagan o Felix Rodríguez, pero pa eso faen falta bonos profesionales, perres y trabayu. Tuvimos la suerte de consiguir patrocinios d'entidaes asturianes comprometíes col horru pa poder trabayar un equipu de seis persones dellos díes siguíos nuna zona concreta d'Asturies. Fizo falta muncha planificación porque hai munchísimos horros y esti país tien una xeografía complicadina. Ehí valoré cuntar col diseñu de producción que fizo la mio socia de La Rebequina Natalia Zapico nun momentu nel que cualquier producción audiovisual tien dificultáes añadíes.

Otru pegoyu de la serie dende llueu son los personaxes. Nun se trataba namái de buscar a tolos ‘espertos’ porque hai xente que fizo muncho nel estudiu del horru y que nun sal na serie. Pa min lo importante ye que fuera una seleición de voces lo más coral posible, con xente conocío, amigos, pero tamién con xente a la que nunca entrevistara y dende llueu, eses persones maravioses qu'apaecen nos pueblos y que te camuden el guión dafechu coles sos frases delicioses.

¿Cómo enfocaron el tratamientu llingüísticu?

Dende’l principiu tuvimos claro que teníamos una hestoria que podía interesar mas allá de les fronteres asturianes, asina que tomé la decisión de presentar en castellanu pa abri-y más puertes a ‘L’horru’ y facilitar el so espardimientu. Pero foi tambien una decisión técnica. Les presentaciones a cámara y la voz n’off tán escrites de mano y grabaes en llocalización. Facelo en billingüe yera bien abegoso y a cencielles duplicare les hores de grabación. Opino amás que presentar n’amestáu apurre pocu. Asina qu’ente correcto asturianu y correctu castellán tomé una decisión, sabiendo que cualesquier d’elles diba restame puntos a dambos llaos del polarizáu espolín cultural asturianu.

Polo demás creo que la serie amuesa la realidá llíngüistica d’Asturies. Xente que fala castellano, asturianu, gallego o amestáu.

Depués de percorrer toa Asturies, ¿cómo vio l’estáu d’esti patrimoniu?

Ye difícil facer un diagnósticu creíble mientres nun sepamos con precisión cuántos horros, paneres y cabazos hai n'Asturies. Si nun sabemos si hai 200, 400 o 600 horros del sieglu XVI malapenes vamos poder dicir cuál ye l'estáu de los elementos más sensibles d’esti patrimoniu. El problema ye qu'hai munchos y catalogalos toos ye un trabayu inmensu. Amás el so estudiu tovía ye nuevu, ye una disciplina bien moza qu’entamó a lo últimos de los años 70 del sieglu pasáu y anque hai munchos y bonos trabayos sobre l´horru namáu vemos la punta l’iceberg. En cualesquier momentu aparez otru horru que tien un detalle ocultu que puede camudalo too.

Lo qu’a min m’esmolez nun ye l’horru, qu’hai munchos y duren sieglos, lo que m'esmolez ye’l nuesu venceyu con ellos. Cuanto más los inoramos mas lloñe tamos de ser lo que realmente somos. Son un monumentu al autuodio asturianu porque entá siendo un iconu identitariu desconocémoslos fondamente. Pa min tamién son un recordatoriu d'esa zuna d'esmagayar el pasáu como si fora un desfechu o a venceyar lo vernáculo cola miseria, cuando delles vegaes ye tolo contrario porque los horros recuérdennos qu'Asturies foi una potencia agraria con un patrimoniu brengosu y ricu . Como diz l’arquiteutu Xuan Pedrayes na serie, “l’horru ye un diagnósticu d'Asturies”.

Vusté tien dicho tres finar la emisión que “nun somos nós los que tenemos que salvar l’horru, ye l'horru’l que tien que salvanos a nós”.

De xemes en cuando dame la sensación que miramos pa los horros con caridá mal entendida. Danos pena velos ende tan solinos y abandonaos. Pero l'horru míranos dende enriba porque ye sobreviviente de milenta fames y pestes. Ta en silenciu esperando’l momentu nel que pueda volver a sirvinos, que va ser más pronto que tarde, porque nun tengo nenguna dulda que l’horru volverá a escribir una páxina brillante nel sieglu XXI. En cuantes despertemos d’esta pesadiella globalista y criminal, muncha xente va volver al pueblu, al güertu…, y al horru pa guardar pataques, pa poner un estudiu, pa calcala o pa ensugar marigüana, lo mesmo me da, pero l’horru yá ta volviendo y vamos velo resurdir.

¿Podemos ser optimistes sobre’l futuru de los nuesos horros y paneres?

Sí, porque la mayoría de los horros y paneres van sobrevivinos a toos los qu’agora habitamos esti planeta. Hai bien dellos, son unos edificios difíciles de matar y munchos son sagraos nel sentíu más espiritual de la pallabra. Entá tando en ruines inda pueden llevantase otra vegada más y volver a predicar na aldea. Nun ye’l casu de les ‘pallozas’ (que yá tán acabaes) o les cabanes de les brañes (que lleven un camín asemeyao). Por más que se diga que l’horru yá nun tien usu, non, nun ye verdá. Cuasi pa cada dueñu o dueña, l’horru sigue teniendo xeitu, magar que seya namás el simbólicu, y por eso se caltién la mayoria d'ellos.

La solución pa los horros, como pa too, ye l’amor. Pero non esti amor xabaz que glayamos cuando cai un horru señaldao, sinón l’amor que vien del conocimientu y el respetu bien entendíu. Si nun sabemos lo que tenemos nun podemos aprecialo. Lo mesmo que pasa cola hestoria, cola llingüa y cola comunidá.

Ún de los aspeutos que cuidó ‘L’horru’ foi la so banda sonora.

Siempres digo qu’Asturies güei ye un país de música virtuosa porque la tonada y la gaita son disciplines cultes regaes por esi xigante musical que ye l’océanu Atlánticu. Cuando punximos a editar el programa somorguiámonos na musica que se fai n'Asturies y salimos con 32 temes de 23 artistazos del país. La playlist ta en Spotify y amuesa la calidá y variedá de música que tenemos equí. La música tradicional asturiana tien una puxanza tremenda y se cuela en tolos mundos musicales dende’l cantar, el rock o’l folk en tola so estensión.

Depués de la emisión en TPA, ¿a qué otres pantalles va llegar esta serie documental?

La emisión de la serie apurrió más de 6 por cientu d'audiencia media a TPA y superó a trés cadenes nacionales na so franxa d'emisión. Yo creo que nun ta mal pa un documental bien llargu sobre horros. Pero pa min tovía más satisfactorio son les enerxíes que removió ‘L’horru’. Yo creo que ye un fenómeno dignu d'analizar, pero dende’l entamu de la pandemia’l COVID, los artesanos que trabayen nesti mundu tan notando una mayor demanda de la xente pa facer o axeitar l’horru. Cola emisión de la serie esti fenómenu aumentó bastante a dicir de toles persones que participaron nella. Sabemos de muncha xente que n’acabante ver un capitilu salió con una llinterna a mirar si’l so horru tenía dalguna talla oculta. O xente que taba delantre la tele con una llibretina p’apuntar les llocalizaciones onde dir a ver horros. Coses que faen sentir arguyu, dende llueu

Nun tardando muncho la serie va volver a emitise en TPA, pero tambien podemos anunciar que ‘L’horru’ viaxará en tren y tará disponible, a partir de xunu, pa viaxeros de l'AVE y l’Alvia, na plataforma PlayRenfe, en tolos trayectos nacionales. Si too va bien, llueu vamos anunciar que ‘L’horru’ tará nel catálogu d'una plataforma dixital puxante, reconocida pola calidá del so conteníu, y que nos fai muncha ilusión.

¿Tienen en mente entamar proyeutos asemeyaos sobre bienes del nuesu patrimoniu dau’l resultáu que tuvo ‘L’horru’?

Ye dificil trabayar al nivel de ‘L’horru’ nes condiciones económiques que tien el sector n’Asturies. Pa ello ye necesario qu'esistan patrocinadores comprometios pa cola cultura porque'l presupuestu de RTPA ye probe y nun tien traces d'espolletar nesti contestu de crisis permanente. El periodismu ta muertu y namái nos queden la cultura y l’arte pa poder amosar la verdá, por eso me paez imprescindible caltener la máxima independencia posible.

Dicho esto, la respuesta ye sí. Tamos valorando formes y formatos pa poder da-y continuidá a esti trabayu y siguir amosando cultura asturiana porque vemos qu’esiste una verdadera demanda de conteníu de calida n’Asturies y si queremos una televisión pública meyor vamos tener que facelo con coraxe.