Tomé usó l'asturianu pa prometer el so cargu

Trés diputaos de Podemos tamién emplegaron les llingües propies d'Asturies nel 2019.

Cova Tomé foi la única que se salió del "prometo" sobre l'Estatutu d'Autonomía y la Constitución, o'l "xuro" sobre tamién una 'Biblia de Jerusalén' qu'adoptaron tolos parllamentarios de la derecha cola esceición única de populares Álvaro Queipo y Luis Miguel Venta, na sesión constitutiva de la Cámara celebrada ayeri. "Prometo pol Estatutu d'Autonomía y pola Constitución española cumplir les mios obligaciones na Xunta Xeneral d'Asturias", espresó la valdesana.

Nel 2019 foron tamién los diputaos de Podemos los qu'acompañaron la so promesa con un mensaxe, anque nesa ocasión los dos de VOX, Sara Concepción Álvarez Rouco y Ignacio Blanco, espresaron un "por España, sí juro'. Lorena Gil, que fora candidata naquella cita eleutoral, espresó que "pola defensa del presente y futuru d'Asturies y polos derechos de toles persones, sí prometo".

Pela so parte, Rafael Palacios dixo "por Asturies, pola defensa de los derechos de toles persones, pola defensa de los derechos del pueblu asturianu, sí prometo", y Nuria Rodríguez "pola defensa del presente del presente y futuru d'Asturies, pola defensa de los derechos de tola xente, sí prometo que vou tar al servicio d'Asturies y a nosa xente asturiano". Daniel Ripa, mentes, emplegó'l castellanu.

Llectura de la normativa en llingua asturiana

Emilio León, Enrique López Hernández, Héctor Piernavieja, Andrés Ron y Lucía Montejo foron los parllamentarios de Podemos, partíu qu'entraba per primer vez na Xunta Xeneral, que prometieron el so cargu nel 2015 usando l'asturianu, al igual que dellos diputaos d'Izquierda Xunida (IX). Naquella ocasión, Piernavieja, como miembru de la Mesa d'Edá al ser el más mozu, lleó la normativa sobre les votaciones pa la presidencia de la Cámara y la formación de la Mesa en llingua asturiana.