L'asturianu suena más que nunca na Xunta Xeneral

Na sesión constitutiva de la Xunta Xeneral, l'asturianu tuvo más presencia que nunca. Cinco diputaos de Podemos emplegaron l'idioma. Sanjurjo preside de nuevo la Cámara.

Emilio León, Enrique López Hernández, Héctor Piernavieja, Andrés Ron y Lucía Montejo son los parllamentarios de Podemos que recoyeron l'acta de diputaos usando l'asturianu. Nel casu de Piernavieja, abrió la llexislatura nueva lleendo la normativa nel nuesu idioma sobre les votaciones pa la presidencia de la Cámara y la formación de la Mesa. Otra manera, según comentól diputáu d'IX Gaspar Llamazares na so cuenta de twitter, diputaos de la so formación tamién prometieron el cargu en llingua asturiana. D'esta forma, el nuesu idioma, de siempres tapecíu nel Parllamentu asturianu, tuvo más presente que nunca. Daniel Ripa foi ún de los cuatro diputaos de Podemos qu'usó'l castellanu anque na so promeso fixo referencia a la recuperación "de los derechos lingüísticos".

Pedro Sanjurjo resultó escoyíu otra llexisltatura más como presidente de la Xunta Xeneral tres una votación a la que tamién se presentó la popular Emma Ramos pese al alcuerdu esistente ente tolos grupos, a esceición del PP, de repartir tolos cargos de la mesa. D'esta forma, la formación liderada por Mercedes Fernández pierde la vicepresidencia primera que-y correspondería, pasando ésta a María Josefa Miranda (IX), y tien que conformase cola vicepresidencia segunda, que va ocupar José Agustín Cuervas-Mons. Na votación pola presidencia, Sanjurjo, que ganó a Ramos en segunda ronda al nun tener mayoría absoluta na primera, contó col apoyu de los diputaos d'Izquierda Xunida y Ciudadanos, mentes que la popular namái algamó los de Foro.

El partíu encabezáu por Cristina Coto foi'l perxudicáu que quedó finalmente fuera de la Mesa, yá que pa la secretaría primera resultó escoyíu Ignacio Prendes (Ciudadanos) y pa la segunda, Rosa María Espiño (Podemos), que ganó na votación a Esther Landa tres empatar dambes a 14 apoyos.

Na semeya, fecha por Daniel Ripa, Piernavieja llee la constitución de la Xunta Xeneral en llingua asturiana.