Tomé tampoco nun llibra del espediente

Trés de los cuatro primeros escoyíos en primaries pa la llista eleutoral pola militancia de Podemos, amenazaos d'espulsión de la mesma.

Depués de que Xune Elipe, númberu 2, recibiera un espediente que podría llevar a la so inhabilitación y espulsión de dicha llista, al igual que-y asocede al númberu 4, Jorge Fernández Iglesias, agora-y llega'l turnu a Cova Tomé, ganadora de les primaries con 1.565 puntos polos 1.150 d’Alba González Sanz, naquel momentu secretaria d'Organización de Podemos. Asina lo comunicó la escoyida poles bases pa liderar la candidatura a la Xunta Xeneral esta mañana.

"Agora tócame a min. Sigue l'atropellu democrático y la falta de respetu a toles personas que nel so momentu sofitasteis, col vuestru votu, la candidatura qu'encabezo", apuntó al tiempu que recordó que "dende la nuesa victoria fui menospreciada pola direición interina del partíu n'Asturies, con Rafa Palacios a la cabeza. Nun toi siendo convidada a los actos pa intervenir en medios. Tampoco nun apaezo nes redes de Podemos Asturies. Dende llueu nun dispongo de nengún recursu económicu o humanu d'apoyu a la campaña na que deberíamos tar toes enfotaes, trabayando pa trunfar en mayu".

Pa esta tarde Tomé convocó una rueda de prensa a les 18.15 hores enfrente de la sede en Podemos, onde tamién va tar presente Elipe, Fernández Iglesias y Laura Tuero, númberu 3 de la llista pa denunciar esta situación.