Ron denuncia que’l ‘Comité de Seguridad’ de Podemos supón que busca “equívocos intencionados” por usar l’asturianu

“Retrocede a los peores tiempos onde l’asturianu, el gallegu, l’eusquera o’l catalán yeren prohibíos en favor de la convivencia”, apunta Andrés Fernández Vilanova ‘Ron’ depués de recibir una respuesta del ‘Comité de Seguridad y Salud Laboral’ de Podemos a un escritu nesti idioma. Los sos miembros suponen que l’ex diputáu, ún de los espedientaos por esti órganu, busca “equívocos intencionados” al emplegar esta llingua.

“El mensaxe en cuestión señala que ‘le agradeceríamos que utilizara el castellano’ y ‘no queremos entender que –emplegando l’asturianu– está buscando equívocos intencionados en la comunicación’”, unes pallabres qu’indignaron a Ron, que les ve tamién como una esixencia a usar el castellanu nos sos recursos a un espediente abiertu llueu d’una denuncia anónima. “Yera lo que me faltaba, sentir que por falar n’asturianu voi falar de forma equívoca. Una connotación tan ofensiva que raspia la xenofobia”, afirmó.

Na so respuesta posterior decidió siguir utilizando l’asturianu –y tamién el gallego-asturiano– ensin recibir entovía contestación. “ ¡Qué dalguien diga qu’usar la nuesa llingua autóctona sía promover equívocos ye una inmensa falta de respetu y retrocédenos a los peores tiempos, onde l’asturianu,el gallegu, l’eusquera o’lcatalán yerenprohibíos en favor de la convivencia!”, espresa Ron.

El que fora diputáu de Podemos pol Occidente considera “incomprensible qu’un ‘Comité de Seguridad y Salud’, ensin identificase, que ta impulsando montaxes contra candidatos y cargos políticos, tenga güecu en Podemos. Siempre defendimos la plurinacionalidá y el plurillingüismu. ¿Qué será los siguiente? ¿Qu’intente eliminar el nome de ‘Asturies’? Ye una ofensa a Asturies: los trabayadores de recursos humanos y de la secretaría d’Organización de Podemos que componen el comité no pueden pasar pencima d’Asturies y de la nuesa llingua y cultura. Más centralismu y más autoritarismu, menos derechos llingüísticos”, afirma.

Pide la paralización de los espedientes

Ron ye una de les persones espedientaes por dichu ‘Comité de Seguridad y Salud Laboral’, llista que s’amplía a la candidata a les eliciones del 28-M, Cova Tomé, y a los númberos 2 y 4, Xune Elipe y Jorge Fernández Iglesias. Tamién recibieron notificaciones Rubén Rosón, conceyal de Somos Uviéu, y Jara Cosculluela, ex responsable de Feminismos de Podemos Asturies y ex secretaria d’Organización xunto col propiu Ron, amás del diputáu y ex secretariu xeneral Daniel Ripa, espulsáu finalmente del partíu.

El pediatra pide la paralización de lo que considera un montaxe y esplicaciones públiques de los responsables políticos qu’impulsaron estes actuaciones. Nel so casu, informa, entamóse de forma anónima, ensin firmes de les persones qu’investiguen nin información de los fechos polos que recibe l’acusación.

Na semeya, Ron, xunto con Ripa y militantes en febreru fuera de la sede de Podemos n'Uviéu llueu de conocese la espulsión del ex secretariu xeneral de Podemos.