Talgo entregaría los trenes Avril a partir del 8

El ministru Óscar Puente fai pública la fecha dada pola empresa y el presidente asturianu Adrián Barbón confiésase "incrédulu".

Talgo comunicó al Ministeriu de Tresportes y Movilidá Sostenible qu'a partir del día 8 entregaría a Renfe los primeros trenes Avril encargaos. Una anuncia realizada por Puente en 'Más de uno' n'Onda Cero a una entruga del presentador Carlos Alsina refriéndose a la conexón con Vigo, tamién n'espera de los Avril, que'l propiu responsable de la cartera nun dio como definitiva: "Tamién nos dixeran que nos lo entregaben dende'l 1 y nun se produxo, nun puedo concretar un fecha", afirmó.

Estos trenes, la serie 106 de Talgo, más grandes y rápidos, lo que va proporcionar un recorte de tiempos nos viaxes de velocidá ferroviaria alta dende y hacia Asturies, tardaríen unes selmanes n'entrar en serviciu dende la so entrega. Y Barbón, pela so parte, nun quier saber de feches, namás "cuando tea zarrada la de puesta en funcionamientu".

Na celebración d'El Bollu, n'Avilés, el socialista apuntó "que, magar tol mundu sabe que suelo ser bastante creyente, nesto me convertí nun incrédulu absolutu". "Sé que'l problema ta en Talgo", añadió, "que lleva retrasando la entrega más de dos años y mediu", y esixó al ministeriu, a pesar de que nun considera al equipu actual como responsable, "que cualquier fecha o cualquier plazu qu'hai sobre Asturies siempre hai problemes, y esto tien qu'acabar".

Na imaxe, tren Avril na so versión económica Avlo na estación de Lleón en febreru pa facer pruebes pela variante de Payares.