Los trenes Avril yá circulen peles víes asturianes: éstos son los sos horarios

A les 6 hores facía’l primer percurríu el S-106, conocíu como Avril y comercializáu baxu la marca AVE de Renfe, ente Asturies y Madrid. Éstos son los horarios hasta’l 21 de xunetu d’estos trenes qu’aumenten la capacidá de les 299 places de los Alvia a 507 y recorten tiempos.

La velocidá alta ferroviaria ye yá un poco más rápida nes sos conexones con Asturies. Los trenes nuevos de Renfe, comercializaos como AVE pero que dende La Pola a Xixón circulen a velocidá convencional, son una realidá y xunen Xixón con Madrid en 3 hores y 38 minutos nel meyor horariu –depende del númberu de paraes– cuando l’Alvia diariu fai la mesma ruta en 3 horas y 47 minutos, a lo qu’hai que sumar una mayor comodidá pa los viaxeros.

Hasta’l 21 de xunetu va haber direición Madrid dos frecuencies AVE diaries, a esceición de los domingos que va contar con una, la que tolos díes sigue hasta València y Castelló. Mentes, va haber dos con Alvia, trés el domingu, ún con final n’Alacant.

Direición Asturies van ser, mentes, ún diariu y otru de llunes a sábadu. Alvia va haber dos diarios qu’aumenten a trés los sábados.

Avlo, próximamente

Cuando finen les obres na estación madrilana de Chamartín ta previsto que s’incorpore a la ruta los trenes Avril na so versión económica, comercializaos por Renfe como Avlo, y una frecuencia diaria Alvia hasta Avilés, según confirmó esta mañana’l conseyeru de Fomentu, Cooperación Llocal y Prevención de Quemes, Alejandro Calvo, que viaxó nel primer tren Avril. La pretensión del Gobiernu ye negociar una parada en Mieres nel primer AVE de la xornada ensin qu’afeute a los tiempos de viaxe.