SUATEA tresllada personalmente a Celaá la demanda de la creación de la especialidá docente

Presentó tamién de manera formal un escritu nel Ministeriu d'Educación y Formación Profesional pa modificar el Real Decretu.

Isabel Celaá aconceyó ayeri colos axentes sociales progresistes pa intercambiar puntos de vista sobre la derogación de la Llei Orgánica pa la Meyora de la Calidá Educativa (LOMCE) y buscar el so sofitu a la nueva Llei d'Educación que tien preparada'l PSOE. Nesta xunta, el Sindicatu Unitariu y Autónomu de los Trabayadores de la Enseñanza d'Asturies (SUATEA), al traviés de los representantes de la Confederación de Sindicatos de Trabayadores de la Enseñanza (STEs-Intersindical), a la que pertenez, presentó personalmente a la ministra la demanda de creación de les especialidaes de Llingua Asturiana y Gallego-asturiano.

D'igual forma, entregó un escritu énte'l ministeriu nel que reclama "la modificación de los Decretos d'especialidaes de los cuerpos de Maestros, Secundaria y Enseñanzas de Réxime especial (Escueles Oficiales d'Idiomes) pa que la comunidá autónoma asturiana pueda crear les especialidaes de Llingua Asturiana y Gallego-asturiano. Pa ello, debería incluyir nel artículu 2.2 del Real Decretu de Maestros y nel artículu 2.3 del Real Decretu de Secundaria'l testu "naquelles comunidaes autónomes nes qu'haya llingües non oficiales que tengan proteición llegal y formen parte del currículu, podrá dase tamién, a pidimientu de la comunidá autónoma y según necesidaes educatives, la especialidá propia de la llingua respeutiva”, mesmu criteriu que se siguió pa encaxar l'asignatura de Llingua Asturiana y de Gallego-asturiano na LOMCE.

"L'atención d'esta demanda evitará la discriminación evidente y intolerable que sufre'l coleutivu d'enseñantes d'esta especialidá, eliminando la so situción alministrativa anómala y dotándolos de los mesmos derechos que tien el restu de profesoráu d'otres especialidaes", esplica SUATEA nel escritu. Celaá comprometióse col conseyeru d'Educación y Cultura, Genaro Alonso, nuna entrevista celebrada'l día 16 en Madrid, a estudiar esta demanda tamién del Gobiernu asturianu.

Na semeya, Celaá mientres la Conferencia Sectorial d'Educación última, celebrada esti mes.