Alonso anuncia que Celaá estudia la creación de la especialidá docente

Espera tener una respuesta de la ministra d'Educación "nos meses próximos".

Genaro Alonso, a entrugues de los periodistes presentes tres la presentación del informe sobre l'estáu del sistema educativu que fai tolos años el Conseyu Escolar del Principáu d'Asturies, anunció qu'Isabel Celaá "valoró mui positivamente" el pidimientu de la creación de la especialidá docente de Llingua Asturiana y Gallego-asturiano y que va estudiala, según recueye Europa Press. Ésti foi ún de los puntos que trató cola ministra d'Educación y Formación Profesional na entrevista solicitada pol conseyeru d'Educación y Cultura que se celebró'l miércoles pasáu en Madrid, como pudo confirmar Asturies.com, pero del que nun dio información nenguna hasta ayeri.

Pa la creación de la especialidá ye necesaria la modificación del real decretu 1834/2008 de Primaria y Secundaria pa encaxar, como s’algamó cola LOMCE, qu’aquelles comunidaes con llingua propia non oficial pero con implantación curricular puedan desarrollar la especialidá docente de dichu idioma. El PP negóse a dar esi pasu, polo que llegada de la ministra socialista tres la moción de censura a Mariano Rajoy facía pensar nun cambiu de criteriu en Madrid que cumpliera esta vieya demanda del sector educativu y compromisu del Gobiernu pa esta llexislatura.

Horros y frixuelos

Mientres s'espera pola respuesta de Celaá, que preve pa los "meses próximos", Alonso presentó los datos del informe, que reflexa que'l país tien la meyor tasa bruta de titulación n’Educación Secundaria Obligatoria (ESO) del Estáu, con un 87,8 por cientu, y ye la tercera con más porcentaxe de titulación en Bachilleratu. Nun recáu a Pablo Casado, presidente del PP, aseguró qu'estos resultaos nun son frutu "d'estudiar horros y frixuelos".

Na semeya, el secretariu d'Estáu d'Educación Alejandro Tiana, Celaá y Alonso.