Sotrondio y L’Entregu reciben la Xira pola Oficialidá

Samartín del Rei Aurelio acueye esta selmana cinco díes d’actividá en llingua asturiana pa concienciar sobre la necesidá del reconocimientu llegal de les llingües d'Asturies. La Xira pola Oficialidá, que va reconocer a los primeros docentes que punxeron nel 1984 la materia de Llingua Asturiana y Lliteratura, prográmales en Sotrondio y L’Entregu hasta’l vienres, cuando Xulio Arbesú va protagonizar un pieslle musical.

La Fundación Almastur y Iniciativa pol Asturianu son los impulsores d’esta cita cultural qu’arrancó n’abril en Bimenes y que tien la pretensión de percorrer el país, Madrid y otros territorios con llingua propia. Villaviciosa ta prevista que sía, del 6 al 10 de payares, la tercer parada de la Xira pola Oficialidá, que s’entama gracies a la collaboración de los conceyos.

La Casa de la Xuventú de Sotrondio va acoyer la mayor parte d’actividaes, como la presentación de la campaña y la inauguración de la esposición ‘Voces, una hestoria de la llingua asturiana’ prevista pa esta tarde a les 19 hores. L’actu va contar cola presencia del alcalde Xosé Ramón Martín Ardines y va completase cola proyeición del documental ‘De güeles a nietes’, una producción d’Iniciativa pol Asturianu y Cuatro Gotes qu’afonda sobre la tresmisión xeneracional del asturianu.

L’alcuentru de docentes pioneros nel enseñu de la materia de Llingua Asturiana y Lliteratura col envís de reconocer el so llabor nesos difíciles primeros años va protagonizar la xornada de mañana, actu previstu pa les 19.30 hores tamién en Sotrondio. El CP El Parque, de Blimea, foi ún de los centros pilotos na incorporación del asturianu na escuela nel 1984, pero’l CP El Bosquín, de L’Entregu, tamién pasó a la historia nel cursu 2017-2018 al participar nel Plan Pilotu esperimental de Promoción del Usu del Asturianu en cuartu de Primaria que facía vehicular l’idioma nuna materia, polo que tamién tendrá presencia nel homenaxe.

Charra sobre la toponimia del llugar

La Biblioteca de L’Entregu na Casa de la Cultura Gaspar García Laviana va recibir l’actividá del miércoles, una charra-coloquiu sobre la ‘Toponimia de Samartín del Rei Aurelio. Lo que mos diz el nome de lo pueblos’ a cargu de, Ramón d'Andrés, profesor de la Universidá d'Uviéu, nel que’l filólogu va esplicar l’orixe de los diferentes nomes de los pueblos del conceyu a les 19.30 hores. Sotrondio, mentes, va acoyer les dos restantes, a la mesma hora.

El xueves Alma Hidalgo, vocal de mocedá y voluntariáu d’Iniciativa pol Asturianu, protagoniza otra charra-coloquiu, nesti casu de nome ‘¿Por qué sí a la oficialidá del asturianu?’. Mentes, el vienres va ponese’l ramu a la parada de la Xira pola Oficialidá en Samartín del Rei Aurelio con un actu reivindicativu que va entamar con una apertura musical con miembros de la Banda de Gaites de Samartín del Rei Aurelio, un recital poéticu y la llectura del Manifiestu pola Oficialidá, encargándose l’esctritor y músicu de L’Entregu, Xulio Arbesú, del pieslle musical.

Na semeya, dos visitantes lleen dalgunos de los paneles que conformen la esposición 'Voces', cedida pol Viceconseyería de Cultura, Política Llingüística y Turismu, na primer parada de la Xira pola Oficialidá en Bimenes.