La parada de la Xira pola Oficialidá en Samartín del Rei Aurelio arrancó con ésitu de públicu

La selmana d'actividaes pa concienciar sobre la necesidá del reconocimientu llegal del asturianu sigue con un homenaxe a los primeros maestros d'asturianu.

La inauguración de les dos esposiciones de la Xira pola Oficialidá y la proyeición del documental ‘De güeles a nietes. El retu de la tresmisión xeneracional del asturianu’ axuntó a numberosu públicu na Casa de la Xuventú de Sotrondio. Al actu, primeru de los cinco previstos hasta'l vienres, acudió l'alcalde Xosé Ramón Martín Ardines, que tuvo acompañáu por Carlos Rubiera, presidente del Patronatu de la Fundación Almastur, y Xuan Pandiella, d'Iniciativa pol Asturianu, les dos organizaciones qu'entamen esta iniciativa que pretenden llevar a toa Asturies, Madrid y otros territorios con llingua propia.

Esta tarde, a les 19.30 hores na mesma instalación, va tener llugar ún de los eventos principales de la selmana. Trátase d'un alcuentru de docentes pioneros del enseñu de la materia de Llingua Asturiana coincidiendo con que'l CP El Parque, de Blimea, foi ún de los centros pilotos na incorporación del asturianu na escuela nel 1984, y que'l CP El Bosquín, de L’Entregu, tamién pasó a la historia nel cursu 2017-2018 al participar nel Plan Pilotu esperimental de Promoción del Usu del Asturianu en cuartu de Primaria que facía vehicular l’idioma nuna materia.

Mañana, toponimia del conceyu

L’Entregu, en concreto la Biblioteca de la Casa de la Cultura Gaspar García Laviana, va acoyer mañana a les 19.30 hores una de les actividaes de la Xira pola Oficialidá. Ye una charra-coloquiu sobre la ‘Toponimia de Samartín del Rei Aurelio. Lo que mos diz el nome de lo pueblos’ que va poner Ramón d'Andrés, profesor de la Universidá d'Uviéu, nel que’l filólogu va esplicar l’orixe de los diferentes nomes de los pueblos del conceyu.

El xueves y el vienres Sotrondio va ser sede del restu de la programación, que va consistir na charra-coloquiu ‘¿Por qué sí a la oficialidá del asturianu?’ d'Alma Hidalgo, y la llectura del Manifiestu pola Oficialidá y actu musical cola Banda de Gaites de Samartín del Rei Aurelio y Xulio Arbesú, de manera respeutiva.

Na semeya, un momentu de la proyeición del documental nuna sala enllena de públicu.