Soto Rei recuerda al so paisanu Aurelio Argel con unos alcuentros de música tradicional

José Manuel Tejedor y Dixebra, que toca tamién en Cantabria esta fin de selmana, protagonicen el conciertu n'alcordanza al periodista especialista en música folk.

Llueu de dos años de parón pola pandemia, la Banda Gaites Soto Rei recupera'l Conciertu n'Alcordanza d'Aurelio Argel, que vivió nel 2019 una primer y única edición nel cabudañu del so paisanu, cola presencia de Llan de Cubel y Fred Morrison. Agora, trés años depués, recupera esta cita encuadrada nunos Alcuentros de Música Tradicional.

Dichu conciertu va abrir mañana l'actividá a les 22 hores cola actuación de la banda de gaites, pa siguir con dos bandes con discu nuevu baxo'l brazu. José Manuel Tejedor presenta 'Lluz', el so segundu álbum d'esta nueva etapa musical, mentes que Dixebra ta dando a conocer los cantares de 'Ente la niebla', un discu-llibru conceputal sobre la historia de les clases populares asturianes que ye'l trabayu más ambiciosu del grupu nos sos 35 años de vida.

Los dixebriegos van repetir actuación tamién el sábadu en Cantabria, en concreto en Bárcena de Pie de Concha, nel valle d'Iguaña. Van ser cabeza de cartelu del festival solidariu A la Sombra de Jano y van compartir escenariu colos tamién asturianos La Tarrancha, Stock, Los Castos y Andazio, mentes que mañana van tocar Funkiwis, De Kanteo y Leona.

Nueche en Danza

En Soto Rei tamién va haber actividá de sábadu. Pela mañana va entamase la VII Carrera de Monte 'Sierra de Llagos' y a les 15 hores va celebrase una xinta de xermandía.

La carpa va acoyer llueu una Nueche en Danza que va principiar de tarde, a les 18 hores, con un conciertu de Cadorna. A les 20 hores va haber un cursu de baille tradicional con Pau Santirso y María Vázquez, y dende les 22 hores una bandina tradicional va animar la madrugada.