Selmana de les Lletres Asturianes

"Sospechamos que tamos nel entamu d'una cuarta fola", avisa Salú

|
Concepción Saavedra sospecha cuarta fola

155 contaxos esti miércoles, con una tasa de positividá del 6,11 por cientu, nuna xornada ensin finaos per segundu día siguíu.

"Amás del posible aumentu de la incidencia hai una tendencia n'ascensu de los ingresos que nos fai sospechar que tamos nel entamu d'una cuarta fola", apuntó esta mañana Concepción Saavedra, direutora xerente del Serviciu de Salú del Principáu d'Asturies (SESPA). Magar l'esmolecimientu esistente, aseguró "tar preparaos pa una respuesta rápida no que se refier a la puesta en marcha d'unidaes d'hospitalización como d'UCI", llamando a la población a la prevención "mientres siguimos calteniendu un ritmu de vacunación altu", la "única ferramienta pa protexer a la población vulnerable".

La Conseyería de Salu, a falta de la espublización de los datos oficiales de la COVID-19, comunicó la detección ayeri de 155 contaxos. Son 39 menos que'l martes, cuando se contabilizaron 194.

El SESPA fixo 3.275 pruebes de diagnósticu d'infeición activa, lo qu'asitió la tasa de positividá diaria nel 6,11 por cientu, inferior al de la xornada anterior, cuando quedó nun 6,82 por cientu, siendo'l porcentaxe a 7 díes del 5,32 por cientu enantes de l'actualización de güei –finalmente xubió al 5,46 por cientu–. Mentes, hai que celebrar dos xornaes siguíes ensin finaos, polo que la cantidá total de persones que perdieron la vida cola enfermedá cuasada pol coronavirus SARS-CoV-2 sigue en 1.926 –súmase una más a la serie por una muerte en díes previos non contabilizada–.

162 pacientes tán hospitalizaos con confirmación o sospecha de COVID-19, 18 menos que'l martes. A ellos hai que sumar 70 ingresaos na UCI, 1 más.

Un biltu nuna residencia de Xixón

Salú detectó un biltu de coronavirus en residencies de persones mayores, lo qu'implica más de trés casos, cuando la selmana pasada hebo dos. El centru afeutáu ye Plaza Real, en Xixón.

Dieron positivo 3 trabayadores, toos asintómaticos. Del 6 al 12 d'abril rexistráronse 7 casos en 6 de los 270 centros qu'esisten n'Asturies, asina como 7 finaos con PCR positiva con domiciliu nellos, ún más que la selmana anterior.

31 biltos activos

Asturies informó al Ministeriu de Sanidá de la esistencia de 31 biltos activos, mesma cantidá qu'hai una selmana, con un total de 283 casos. 17 d'ellos detectáronse estos 7 díes últimos, comunica la conseyería.

Na semeya, Saavedra na intervención d'esta mañana xunto con Rafael Cofiño, direutor xeneral de Salú Pública, y Ismael Huerta, xefe del Serviciu de Vixilancia Epidemiolóxica, pa informa de la evolución de la pandemia.

 

Contador Estadistiques