Sigue'l crecimientu de casos: 434 el miércoles

Rexístrase per segundu día la cifra más alta de la tercer fola. Noreña va ser el siguiente conceyu con restricciones, dende'l sábadu.

La Conseyería de Salú comunicó 434 positivos ayeri –los datos oficiales incorporen 8 más non contabilizaos hasta los 442–, 64 más qu'ayeri cuando, con 370 (nun primer momentu yeren 366), vivíase la xornada con más contaxos de la tercer fola. Ye tamién la peor dende'l 18 de payares, día na que se detectaron 455 (458 col recuentu de cifres).

Fixéronse un total de 5.238 pruebes de diagnósticu d'infeición activa, polo que la tasa de positividá asitióse nun 10,06 por cientu, superior tamién a la del martes, cuando foi del 8,88 por cientu. La tasa de positividá a 7 díes yera, na actualización última, del 8,71 por cientu.

8 persones perdieron la vida ayeri: cinco muyeres de 96, 91, 89, 84 y 79 años y trés homes de 87, 85 y 66, de los que seis vivíen en residencia. Dende qu'entamó l'andanciu yá van 1.436 muertos n'Asturies –los datos oficiales incorporen 2 más de díes previos non contabilizaos–.

Nestos momentos hai hospitalizaos 340 pacientes con confirmación o sospecha de COVID-19, a los qu'hai que sumar 63 que tán na UCI. Son 11 y 9 más que'l martes, de manera respeutiva.

Nueve conceyos n'alerta 4+

Noreña va ser el novenu conceyu con restricciones al entrar nel nivel d'alerta 4+, que significa riesgu estremu. Les midíes más dures pa franar l'espardimientu del coronavirus SARS-CoV-2 nestos territorios con más incidencia entraron güei n'Uviéu, Llanes y Cangas del Narcea, y mañana van facelo en Gozón.

Dende'l martes tán actives n'Avilés, Corvera y Castrillón, complentado la llista Grau, nesti casu dende'l día 12 polos biltos poles fiestes navidiegues con zarru completu de la hostelería amás del zarru perimetral. Pa consultar la situación de tolos conceyos y les restricciones en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

6 biltos en residencies

La conseyería detectó ente'l 12 y el 18 de xineru un total de 6 biltos en residencies de mayores, 1 menos que la selmana anterior, cuando hebo un únicu brotu. En total contabilizáronse 115 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como biltos cuando hai al menos trés. Nesi sen, nesti periodu confirmaróse casos n'otros 21 centros residenciales.

55 brotos activos

Asturies informó al Ministeriu de Sanidá de la esistencia de 55 biltos activos, 16 más que la selmana pasada, con un total de 832 casos. 24 d'ellos detectáronse estos 7 díes últimos, comunica Salú.

Na semeya, Noreña.