SAnTINA Conference aúne nun eventu telemáticu a académicos d’EE XX y Canadá interesaos na filoloxía asturiana

La Society for the ANalysis of Cultural Topics and linguistic Identities N’Asturies (SAnTINA) entama esti xueves y vienres dende California una convención telemática que pretende aunir a tolos académicos d’Estaos Xuníos y Canadá “que trabayen o tean interesaos en trabayar en filoloxía asturiana”. Ana Cano va poner la plenaria de la conferencia.

La doctora xixonesa Covadonga Lamar y la estudiante de doctoráu uvieína Miriam Villazón, entrambes na University of California Riverside, son les impulsores de la SAnTINA Conference, que va arrancar esta tarde a les 16 hores, 7 na hora llocal. “Buscamos xenerar una conversación sobre l’asturianu nun momentu nel que xustamente ye necesario más que nunca tener esta conversación”, espliquen, pa lo que programaron una serie d’intervenciones coles que “cubrimos toles árees, yá que creemos qu’hai muncho qu’estudiar sobre esti tema”.

La respuesta de les persones consultaes pa participar tanto n’Estaos Xuníos como en Canadá foi perbona, lo que-yos fai tar mui agradecíes y animaes pa continuar col proyeutu “y asina caltener unes llinies de contautu, trabayu y investigación ente nosotres, pero tamién abrir esta vía coles académiques que tán n’Asturies”. Dende’l país va participar precisamente la ex presidenta de l’Academia de la Llingua Asturiana y caderalga emérita de Filoloxía Románica de la Universidá d’Uviéu, Ana María Cano, qu’a les 18 de la tarde (9, hora llocal) va poder la ponencia principal de la SAnTINA Conference.

Paquita Suárez-Coalla, María Turrero, Lucía Hermo, Alba Arias, Francisco Fernández-Rubiera, Fátima Serra, Eduardo García Fernández, Yasmine Beale y Paul Sebastian son dalgunos de los otros 24 académicos que van tormar parte estos dos díes nesta iniciativa con intervenciones sobre llingua, cultura y lliteratura asturiana. Toles comunicaciones van poder siguise en direuto al traviés de Zoom rexistrándose equí.

Calque nesti enllaz pa consultar el programa completu.

Semeya propiedá de la University of California Riverside (PhotoShelter).