SAnTINA: “Los falantes d’español n’Estaos Xuníos siéntense identificaos cola situación del asturianu”

La Society for the ANalysis of Cultural Topics and linguistic Identities N’Asturies (SAnTINA) ye una rede d’académicos en Norteamérica interesaos polos estudios asturianos y la filoloxía asturiana que trabaya pola so difusión n’Estaos Xuníos y Canadá. Asturies.com faló con dellos miembros y les sos responsables.

En concreto, participaron nesta entrevista Isabel Álvarez Sancho (Xixón, 1978), Francisco Fernández Rubiera (xixonés nacíu n’Uviéu, 1977), Covadonga Lamar (Xixón, 1979) y Miriam Villazón (Uviéu, 1993). Imanol Suárez-Palma (Avilés, 1988) nun pudo intervenir por tar de viaxe.

¿Cuándo echa a andar la Society for the ANalysis of Cultural Topics and linguistic Identities N’Asturies (SAnTINA)?

Covadonga: La SAnTINA echó a andar nel primer branu de la pandemia. Yera parte d’una conversación qu’Isabel, Miriam y yo mesma teníamos facía tiempu yá. Isabel y yo entamamos a falar d’esto nel 2006, cuando ella yá taba en Michigan y yo taba pensando si tendríemos que colar d’Asturies, como al final foi’l casu. Conforme nos instalamos d’esti llau fuimos pasu ente pasu texendo redes. Dende’l 2016 la University de California Riverside arrancó una collaboración col Muséu del Pueblu d’Asturies na qu’estudiantes californianos trabayen con cartes d’emigrantes asturianos que colaron p’América. Ehí foi cuando s’incorporó Miriam al equipu. La pandemia dionos los medios téunicos que tábemos necesitando, amás de la posibilidá de tar en contautu con otres asturianes y asturianos na diáspora americana.

¿Por qué vieron necesario entamar esi primer congresu?

Covadonga: Asturian Studies naz de la idea de da-y visibilidá internacional a la llingua y la cultura d’Asturies. L’impautu que faiga nun lo conocemos entovía. Sí sabemos que na primera SAnTINA, na University of California Riverside, xuntámonos 30 y pa la segunda, que foi na Oklahoma State University, ya yéramos cerquina de 50 participantes.

Miriam: SAnTINA y Asturian Studies surden como un espaciu collaborativu onde tol mundu ta convidao a participar. Dende la nuesa esperiencia na universidá nos Estaos Xuníos, queremos qu’esti proyeutu acueya a tol mundu. Trabayar fuera d’Asturies y la nuesa esperiencia nos Estaos Xuníos danos una güeyada diferente sobre los estudios asturianos. Equí hai xente que nunca sintió lo que ye l’asturianu y tien muncho interés por conocer más. N’Asturies, la receición ye mui bona.

Isabel: Pue dicise que creamos un coleutivu de migraos asturianos pal sieglu XXI: un rede online de collaboraciones onde podemos falar asturianu y falar d’Asturies dende munches partes del mundu.

¿Qué otres actividaes siguieron a esti eventu?

Miriam: Nel branu del 2022 organizamos unes xornaes en persona, Diaspóriques, pa poner en conversación a asturianos de la diáspora con otros n’Asturies. Foron na Llaboral y tamos agradecíes a Cultura del Principáu por cedenos l’espaciu pa les charres. El Cafetín de les Cigoreyes ye otru espaciu onde compartir, ésti de manera virtual. El fechu de tar lloñe d’Asturies y tamién lloñe ente nós abrionos un espaciu dixital pa caltener el contautu, un espaciu de co-working dixital, abiertu tamién pal que nun trabaye na universidá pero quiera collaborar en SAnTINA.

Isabel: Otra cosa qu’albidrábamos dempués de la conferencia foi si sedría posible llevar Asturian Studies a otros espacios. Nesti sen, púnxime en contautu con ALCESXXI, un grupu d’académiques, creadores y activistes que trabayen en coses ibériques contemporánees. El grupu motor d’ALCESXXI recibiónos de lo meyor y dende entós tenemos un grupo de trabayu nes sos xornaes –esti añu en Santiago de Compostela– y yo collaboro nel espaciu que tienen nel Modern Language Association (MLA) Conference.

Covadonga: Una cosa que nos paez perimportante ye collaborar en publicaciones académiques. Tamos pendientes d’espublizar un llibru con Trabe y tamos arrancando una coleición sobre Asturian Studies con De Gruyter, que ye una editorial de les de más sonadía. Tou eso son resultaos de trabayu en comunidá de munches y munchos de los que tamos al rodiu d’esti grupu. La conferencia de SAnTINA va ser esti payares en Florida, con Francisco Fernández Rubiera y con Imanol Suárez Palma como cabezaleros de la tercer edición.

¿En qué consiste Asturianu101?

Miriam: Asturianu 101 ye una serie de alderiques online nos que nos xuntamos pa falar sobre l’asturianu dende distintos campos, non sólo l’académicu. Tamos por entamar la organización de la tercer serie; nestes dos pasaes contamos con escritores, xente del mundu de la cultura, estudiantes y tamién académicos, pero la idea ye que’l alderique se faiga pa tol que quiera sentase a compartir. 101 ye como se conoz nos Estaos Xuníos a las clases introductories y ési ye’l nuesu oxetivu: crear collaboraciones, xenerar interés en xente que nun conoza Asturies y l’asturianu, y construyir un espaciu en comunidá. La primer serie fiximosla dende la University of California, Riverside, pero pa la segunda contamos con sesiones n’universidaes distintes, non sólo de los Estaos Xuníos, tamién de Suiza, Reinu Xuníu, y por supuesto, la Universidá d’Uviéu.

¿Qué repercusión tienen les sos iniciatives?

Isabel: Queremos pensar que contribúin un poquiñín a poner a Asturies y al asturianu nel mapa internacional, o polo menos n’academia de Estaos Xuníos, onde taba muncho menos representada qu’otres llingües ibériques. Tamién aspiramos a ser un exemplu de grupu collaborativu, coles menos barreres posibles, nin nacionales nin disciplinaries o de xerarquíes.

Falaben enantes de la conferencia de payares en Florida. ¿Qué me puede adelantar d’ella?

Francisco: Pal congresu de SAnTINA 2024 la organización pasa a la coalición ‘astur-floridiana’, a cargu d’Imanol Suárez Palma (Avilés, 1988) que ye profesor na University of Florida y yo mesmo, Francisco Fernández-Rubiera, que soi profesor na University of Central Florida, y contará como conferenciante plenaria cola doctora en Filoloxía Española y académica de l’Academia de la Llingua Asturiana, María del Carmen Muñiz Cachón.

Daes les latitudes nes que se va celebrar el congresu de SAnTINA 2024 contaremos con la participación especial del Centro Asturiano de Tampa, que nos abrirá les sos puertes pa facer una visita retransmitida por videoconferencia a la clausura del congresu.

¿Esiste interés en Norteamérica pola filoloxía asturiana?

Miriam: Dende qu'entamamos la SAnTINA, y coles otres actividaes qu’organizamos (les Conversaciones Diásporiques, el seminariu de ALCESXXI, la serie de charres de Minoritized Iberian Languages: Asturian 101), munchos estudiantes de los Estaos Xuníos participaron nelles. Les opiniones son siempre les mesmes: en California, y concretamente na Universidá de California, Riverside, dellos estudiantes son llatinos, y atopen munches asemeyances ente falar castellanu nos Estados Xuníos y falar asturianu n’Asturies. Esisten una serie de prexuicios sociales polos que falar estes llingües ta visto como daqué malo. L’esfuerzu que los estudiantes ven nes personas que participen nestes actividaes y el llabor fechu poles instituciones que defenden l’usu del asturianu, ayuda-yos a entender la importancia de defender les sos llingües nes sos comunidaes.

Covadonga: Tamos trabayando dende’l 2016 en proyeutos d’investigación sobre Asturies con estudiantes universitarios estauxunidenses. Garren-y apreciu rápidu a Asturies y a les sos manifestaciones culturales. Los que falen español nos Estaos Xuníos siéntense identificaos, como falantes d’una llingua minorizada, cola situación del asturianu.

¿Ven posibilidaes de que l’asturianu tenga presencia en cátedres o dalgún tipu d’estudios universitarios nos Estaos Xuníos o Canadá como tienen otres llingües?

Covadonga: Nosotres tamos dispuestes. Si nos lleen del Gobiernu, o de cualquier institución o empresa que tenga interés en sofitar una cátedra, un grupu d’estudios, equí tamos. Una cosa piquiñina que llogramos, pero de la que tamos perarguyoses, ye que’l Consortium of Iberian Studies na University of California incluyera l’asturianu como una de les llingües ibériques nes que tán interesaos.

¿Tienen dalguna rellación o contautu col Gobiernu asturianu, l’Academia de la Llingua Asturiana o la Universidá d’Uviéu?

Isabel: Nel branu del 2022 tuvimos la oportunidá de collaborar cola xente del Seminariu de Filoloxía Asturiana y pa la primer SAnTINA contamos con Ana Cano como plenarista. Ella siempre ta perdispuesta pa sofitanos en too. Dempués de SAnTINA, l’Academia de la Llingua Asturiana entamó les Xornaes Internacionales d’Estudiu cola temática de los asturianos que tamos fuera. Les trés, y el grupo de SAnTINA en xeneral, fuimos convidaes a participar nel eventu.

Pa la segunda SAnTINA entamamos un premiu a la meyor comunicación d’un investigador mozu y el nome del premiu ye Premiu Ana Cano. El primer gallardón precisamente otorgóse a Claudia Elena Menéndez Fernández, que ta acabante de ser nomada académica. El tamién académicu Inaciu Galán participó en SAnTINA II y considerámonos en sintonía total con pensadores como’l so vicepresidente David Guardado.

¿Qué-y falta al asturianu pa una difusión internacional mayor y meyor?

Covadonga: Al asturianu nun y-falta nada como llingua. Como oxetu social, falta-y la cooficialidá. Ensin eso nun ye posible desendolcar estructures y mecanismos que protexan el patrimoniu de les asturianes y los asturianos

¿Cuántes persones tán detrás de SAnTINA?

Isabel: Munches. Nosotres trés (Covadonga como presidenta, yo como vicepresidenta y Miriam como responsable de rellaciones internacionales y comunitaries) tamos al timón y agora la conferencia númberu trés tán organizándola Francisco e Imanol, la delegación ‘astur-floridiana’. Nun tenemos llista ‘oficial’ d’inscrites porque tolo que facemos ye siempre completamente gratis y tamos abiertes al que quiera y pueda participar. Por da-y una idea, en SAnTINA II a lo llargo de dos díes diéronse 30 comunicaciones d’espertos y espertes de 22 universidaes. Contamos cola colaboración de cuasi 50 persones, ente los que presentaron, los que fixeron de moderadores, y los que participaron nel comité científicu y organizador (la llista completa pue vese nel llibru de resúmenes de la conferencia). Tuvimos 100 persones rexistraes, tanto estudiantes como profesores, creadores y xente del público en xeneral, que foron coneutándose dende España, Estaos Xuníos, Canadá, Australia, Reinu Xuníu y Suiza. Entamar un eventu y una comunidad asina, a la que siguen xuniéndose participantes, como dicen n’inglés, “takes a village”, y la villa que fai posible esto ye maravillosa.

¿Cuáles son los oxetivos que se marquen a curtiu y mediu plazu?

Covadonga: Agora mesmo temos trés volúmenes en progresu: ún dedicaú a los estudios asturianos neel sieglu XXI, otru a escritores asturianes y otru a l’Asturies migrante. Como-y comentemos, tenemos firmáu un contratu con De Gruyter pa una coleición de llibros dedicaos a Asturian Studies (pa la que tamos encantáes de recibir propuestes) y tenemos inaugurada l’area d’asturianu col artículu de cabecera na base de datos Linguistic Minorities in Europe, tamién de De Gruyter, a la qu’agora se pueden mandar artículos sobre l’asturianu.

Como la sociedá va medrando cada vegada más, ún de los oxetivos que temos marcáos pa la SAnTINA III ye aconceyar pa crear unos estatutos que delimiten la gobernanza y les regles de la sociedá, lo que permita asegurar la so continuidá nel futuru. Tamién vamos seguir cola newsletter que tenemos en substack y na que dos veces per añu vamos informando de les nueses actividaes y facemos reseñes de espublizaciones nueves d’estudios asturianos.

Na imaxe, dellos participantes nuna actividá de la rede, con Isabel nel primer cuadráu de la filera superior, mesma que Covadonga (segundu), Francisco (terceru) y Miriam (quintu). Imanol apaez nel estremu derechu de la segunda filera.