Los datos últimos de COVID-19 confirmen la baxada de la curva de positivos nuevos

|
Curves COVID-19 con datos del 7 d'abril

Asturies rexistró esti martes per primer vegada dende l’entamu del andanciu de COVID-19 un descensu de casos activos, asitiándose en 1.309 persones. Esti datu positivu súmase a la mengua de positivos nuevos estos díes últimos, que confirma la baxada de la curva.

Como se pue ver nesta gráfica que toma como referencia los modelos d'epidemies de Verhulst y Gompertz, la evolución sigue la curva marcada pol primeru, que prediz la fin de casos nuevos pa últimos d'abril.

Pa la ellaboración de la mesma tomáronse los datos diarios del Serviciu de Salú del Principáu d'Asturies (SESPA) axustaos por mínimos cuadraos. Éstos dieron ayeri 26 positivos (pa sumar 1.705), polos 33 del llunes y los 41 del domingu, les cifres más baxes dende que’l Ministeriu de Salú centralizó la información el 16 de marzu cola declaración del estáu d’alarma.

A les bones cifres sumóse qu’ayeri per primer vegada dende l’entamu del andanciu’l país tien menos casos positivos que’l día anterior. En concreto, hebo 30 menos p’asitiar el total en 1.309, con 50 curaciones (294 acumulaes), 4 pacientes menos na UCI (70 anguaño) y 23 en planta (377).

Más de 100 muertos

No que respeuta los finaos, hai que llamentar 6 más. D’esta forma sobrepásase la barrera de los cien muertes por cuenta la enfermedá causada pol coronovirus SARS-CoV-2, llegando a les 102.

Otra manera, el Llaboratoriu de Microbioloxía del Hospital Universitariu Central d’Asturies (HUCA) procesó hasta ayeri 18.110 muestres pa determinación de la COVID-19 por PCR.

Contador Estadistiques