Salú Pública fai un llamáu a los veceros de La Buena Vida ente’l 15 y el 28 d’esti mes pa qu’amenorguen l’actividá social

|
Rafael Cofiño La Buena Vida

La situación epidemiolóxica d’Asturies empeora día a día, con 26 casos nuevos. Yá son cuatro los biltos activos nel país, esmoleciendo principalmente’l de llocal xixonés d’aforu grande La Buena Vida, polo que Salú Pública fai un llamáu a los sos veceros ente'l 15 y el 28 d’esti mes pa que se faigan les pruebes de la COVID-19 y tomen midíes de prevención y proteición los 14 díes próximos.

El proceder de la Conseyería de Salú con respeuto a esti brotu ye la mesma que cola de la cervecería Urban’s, qu’ayeri dexó 2 positivos más pa poner el total en 12, pa tratar de frenar l’espardimientu del coronavirus SARS-CoV-2. “Toles persones que foran clientes en dichu llocal del 15 al 28 de xunetu ye necesario que tomen unes midíes específiques: disminuir l’actividá social con un esquisitu cumplimientu de les midíes de proteición –usu de mázcara, llaváu de manes y distancia de seguranza– y vixilancia de síntomes”, apuntó Rafael Cofiño, direutor xeneral de Salú Pública.

D’igual forma, solicita a estos veceros que llamen al teléfonu 985.18.49.49 o rellene’l formulariu esistente na web d’Astursalú, nes redes sociales del Gobiernu o na páxina desendolcada sobre’l coronavirus pa solicitar la prueba, que se fadrá en 24 o 48 hores. “La realización de la prueba ye importante, pero non fundamental. Lo fundamental son les midíes yá citaes”, insistió.

Al respueuto añadió que “la PCR pue xenerar una falsa seguridá. Ye una bona ferramienta de diagnósticu, pero qu’un contautu estrechu tenga una PCR negativa nun quier dicir que tea llibre del desarrollu de la enfermedá nos siguiente díes polos 10 o 14 díes d’incubación”. “Toos y toes podemos ser cortafueos pa disminuir la tresmisión del virus”, siguió Cofiño, que llamó a la responsabilidá individual.

Biltu en Grúas Roxu

El cuartu biltu n’activu, el quintu dende l’entamu del estáu d’alarma, diose na empresa Grúas Roxu, con 4 casos. El de Urban’s suma yá 12 positivos y el de Málaga, que tuvo 2 casos más ayeri, 13.

El de La Buena Vida, que’l miércoles rexistró 2, incorpora otros 2, de trabayadores, p’acumular 14. En total, hai 95 casos n’activu tres los 26 d’ayeri y hai 400 persones en siguimientu por ser contautos estrechos.

Contador Estadistiques