Día del Llibru Asturianu

19 casos más de COVID-19 n'Asturies, de los que 6 tán venceyaos colos biltos

|

Trátase de la cifra más alta dende'l 21 d'abril.

Los datos de la COVID-19 dexaron ayeri 19 positivos n'Asturies. D'ellos 6 proceden de los dos biltos activos: 3 de la cervecería Urban's, dos veceros y un contautu estrechu d'ún de los emplegaos, y 3 del viaxe d'estudiantes de 17 y 18 años a la Costa del Sol.

D'esta forma, asciende a 10 los casos del brotu de La Corredoria y a 11 el d'Andalucía, esto ye, tolos rapazos que tuvieron en Marbella menos ún. Hasta'l momentu fixéronse 1.600 pruebas ente la vecería del chigre uvieín.

Otru llocal, nesti casu ún d'ambiente tanto diurnu como nocherniegu, el xixonés La Buena Vida, suma 2 casos que tán venceyaos con un casu en Madrid. Los propietarios trancaron ayeri'l llocal de manera preventiva.

El restu de contaxos, hasta los 19, son contautos estrechos de casos importaos de Zaragoza, Cantabria y Barcelona. Amás dieron positivu turistes procedentes d'Andalucía y Euskadi.

Toles persones afeutaes pola enfermedá provocada pol coronavirus SARS-CoV-2 presenten sintomatoloxía leve y permanecen n'aisllamientu domiciliario. La cantidá de 19 positivos ye la más alta dende'l 21 d'abril, xornada na que se rexistraron 26 positivos por PCR, anque naquel momentu anunciáronse 54 yá que se sumaben tamién los detectaos por test rápidu.

Contador Estadistiques