Selmana de les Lletres Asturianes

Salú informa de 109 positivos esti llunes

|

La tasa de positividá diaria asitióse nun 5,05 por cientu nuna xornada con dos finaos.

A falta de la confirmación de los datos oficiales de la COVID-19, la Conseyería de Salú informó de 109 contaxos ayeri. Son 5 más que'l domingu, anque la tasa de positividá diaria baxa del 7,15 por cientu al 5,05 tres la realización de 3.190 pruebes de diagnósticu d'infeición activa.

A 7 díes esti porcentaxe'l domingu yera del 4,86 por cientu –l'actualización aumentólu ayeri al 5,04 por cientu–, con una tendencia lixeramente ascendente dende'l xueves, cuando se rexistró un 4,69 por cientu. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

No que respeuta a les muertes, hebo que llamentar 2 ayeri, la d'un home de 86 años y la d'una muyer de 84. Dende qu'entamó l'andanciu perdieron la vida cola enfermedá causada pol coronavirus SARS-CoV-2 un total de 1.821 persones.

Tán ingresaos 218 pacientes con confirmación o sospecha de COVID-19, 3 menos que'l domingu. Mentes, na UCI hai 91 hospitalizaos, 2 más que na xornada anterior.

Contador Estadistiques