Salú habilita'l pidimientu de PCR a persones con síntomes de COVID-19

|
Rastrexadores COVID-19

Va poder facese dende'l sábadu na web Astursalud. Esti xueves superáronse los 200 contaxos, en concreto 203 positivos.

Les persones que tengan "fiebre, tos, dificultá respiratoria o perda d'olfatu o gustu", esto ye los síntomes compatibles cola COVID-19, van poder solicitar una PCR al traviés de la páxina de la Conseyería de Salú a partir de mañana. Miguel Prieto, xefe d'Alertes y Emerxencies COVID, esplicó que s'entama esta midida "pa intentar controlar y detectar de la manera más rápida posible'l númberu de casos que van apaeciendo".

Una medría que nun apara, como amuesen los 203 positivos detectaos ayeri –ye la cifra más alta dende'l 6 d'agostu, cuando se confirmaron 297–, y que ta provocando un "repunte que se ta empezando a observar yá nel númberu de persones que ta siendo hospitalizada". Nel casu de nun camudar esta tendencia "y lleguemos a niveles de 150 ingresaos nos díes próximos, ye posible que tengamos que venos na situación de volver a recomendar l'adopción de midíes más restrictives", confirmó.

Ayeri, xornada na que finó un home de 83 años, yeren 78, 6 más que'l miércoles, de los que 66 tán en planta, 2 más, y 12 na UCI, 4 más. La ocupación total por ye del 2,24 y del 4,32 por cientu, de manera respeutiva.

Otru esmolecimientu ye que "cada casu rastrexáu tien un númberu de contautos estrechos muncho más altu que n'otres foles", rescampló María José Villanueva, coordinadora de Programes COVID.

Suspensión de vuelos col sur d'África por variante nueva

L'apaición d'una variante nueva del coronavirus SARS-CoV-2 na provincia surafricana de Guateng, onde s'asitia Johannesburg, llevó a dellos países como Italia, Reinu Xuníu o Israel, a suspender vuelos colos países del sur del continente, midida que tamién camienta implantar l'Estáu. La Organización Mundial de la Salú aconceya güei pa valorar la gravedá d'esta mutación.

Na semeya, rastrexadores de contautos estrechos de positivos de COVID-19. El Gobiernu ta acabante d'ampliar l'equipu a 60 persones.

 

Contador Estadistiques