Selmana de les Lletres Asturianes

Salú comunica 142 contaxos esti xueves

|
Coronavirus SARS-CoV-2

La tasa de positividá diaria asitióse nun 5,47 por cientu nuna xornada con 2 finaes.

A falta de la espublización de los datos oficiales de la COVID-19, la Conseyería de Salú comunicó la detección de 142 casos nuevos ayeri –l'actualización contabiliza 5 menos por duplicaos de díes anteriores que ponen el total de la pandemia en 44.999–. Son 46 más que'l día anterior, cuando se rexistraron 96, y frena la tendencia lixeramente descendente d'esta selmana.

El Serviciu de Salú del Principáu d'Asturies (SESPA) fixo 3.436 pruebes de diagnósticu d'infeición activa y la tasa de positividá s'asitió nel 5,47 por cientu, pol 5,02 por cientu de la xornada previa. A 7 díes, el miércoles esti porcentaxe taba nun 4,78 –esta cantidá baxaba ayeri al 4,69 por cientu–, primer vegada dende'l 3 de xineru que baxa del 5 por cientu que marca la Organización Mundial de la Salú (OMS) pa tener controlada la pandemia.

Hai que llamenta la muerte de dos muyeres de 84 y 39 años na xornada. Dende qu'entamó l'andanciu perdieron la vida 1.811 persones cola enfermedá causada pol coronavirus SARS-CoV-2.

224 pacientes tán hospitalizaos con confirmación o sospecha de COVID-19, 14 menos que'l miércoles, mentes qu'otros 104 ingresaos tán na UCI, 2 más que'l día anterior.

Contador Estadistiques