‘Refundarse para centrarnos en Asturias’, lema del congresu de Foro

|
Comisión Direutiva de Foro convocatoria Congresu refundacional

El sábadu 19 de xunu ye la fecha escoyida pa la celebración del IV Congreso Extraordinario de Foro Asturias, baxo’l lema ‘Refundarse para centrarnos en Asturias’. La Comisión Direutiva aprobó esti miércoles, pola mayoría de dos tercios que marca los estatutos, la so convocatoria.

L’alcuerdu afitó’l calendariu y l’orde del día del Congresu, que va incluyir una Ponencia d’Estatutos. La Comisión Organizadora va constituyise’l xueves viniente, con Emilia Calvo, conceyala de Casu, como presidenta, y Javier Coya, edil de Ponga, nel cargu de vicepresidente dando entamu a los plazos reglamentarios.

“Ye, a xuiciu de la direición, el momentu de celebrar un Congresu Estraordinariu col fin de refundar esti partíu, renovar les sos estructures, reformular les sos bases ideolóxiques y sentar los cimientos de la casa que queremos ofrecer a cientos de miles d’asturianos y asturianes qu’esixen un proyeutu diferente a lo esistente”, apunta’l documentu d’alcuerdu pa la so convocatoria. El cambiu de nome a Foro Asturias –agora ye oficialmente Foro de Ciudadanos (FAC)–; el cambiu del logu corporativu, que “necesita de una modernización y una conexón más direuta con Asturies”; y la renovación del ideariu “p’adaptalos a una realidá que ye diferente a la d’hai una década” son dalgunos de los oxetivos que se pretenden dende la Comisión Direutiva.

"Partíu asturianu"

“Estes conclusiones falen de Foro Asturias como un partíu asturianu, non nacional, ensin perxuiciu del nuestu firme propósitu de facer valir los intereses d’Asturies a nivel nacional. Falen de Foro Asturias como un partíu autonomista, marcadamente reformista, capaz d’ofrecer una forma tresversal de facer política col meyor interés d’Asturias como meta única. Falen de Foro Asturias como un partíu de centru, sensible a les graves necesidaes sociales qu’esisten y la necesidá d’atacales de forma prioritaria col fin de nun dexar a naide atrás”, amplía. En definitiva, “un partíu políticu nel que Foro Asturias pue vese reconocíu y nel que Foro Asturias pue atopar aunida a una nueva mayoría”.

Poro, va entamase una reforma de los estatutos pa refociar “los mecanismos de democracia interna, de control de les decisiones de los órganos y de seguridá xurídica y tresparencia nes actuaciones internes”, encargándose de la Ponencia Jaime Fernández-Paíno, de l’agrupación de Xixón. Ésta va presentase’l 31 de mayu, con plazu hasta’l 2 de xunu pa les enmiendes y votación de les mesmes del 9 al 19 de xunu, fecha de celebración, de manera telemática, del Congresu a partir de les 9 hores.

L’orde del día del mesmu inclúi trés puntos: la eleición de la mesa, la Ponencia d’Estatutos y l’actu de pieslle. Del 24 de mayu al 10 de xunu va tar abiertu’l plazu pa la solicitú de credenciales.

Na semeya, xunta de la Comisión Direutiva de Foro celebrada na tarde d'ayeri nel uvieín Gran Hotel España, col secretariu xeneral Adrián Pumares y la presidenta Carmen Moriyón na mesa.

Contador Estadistiques