Selmana de les Lletres Asturianes

Foro anuncia la so refundación pa ufrir “a la sociedá un proyeutu políticu útil y centráu n’Asturies”

|
Adrián Pumares y Carmen Moriyón anuncia refundación Foro

La presidenta de Foro, Carmen Moriyón, comunicó esti sábadu la decisión de convocar un congresu estraordinariu de refundación del partíu. Acompañada d’Adrián Pumares, secretariu xeneral y diputáu, la ex alcaldesa de Xixón avanzó que va proponer una renovación d’imaxe y de posicionamientu ideolóxicu “hacia posiciones autonomistes”.

“Voi convocar un congresu estraordinariu de Foro Asturias pa refundar esti partíu y ufrir a la sociedá asturiana un proyeutu político útil centráu n’Asturies”, anunció. Una convocatoria que va tener llugar de manera inminente, entantes del branu.

Rescampló que “queremos refundar esti partíu, renovar les sos estructures, reformular les sos bases ideolóxiques y asentar los cimientos de la casa que queremos ufrir a cientos de miles d’asturianos y asturianes qu’esixen un proyeutu diferente a lo esistente”. Asina, va proponer a la militancia “la renovación de la nuesa imaxe, de los nuesos estatutos y del nuesu posicionamientu ideolóxicu hacia posiciones autonomistes, marcadamente reformistes, capaces d’ofrecer una forma tresversal de facer política col meyor interés d’Asturies como oxetivu únicu”.

En dichu congresu, según confirmó, nun va haber cambios de cargos na Comisión Direutiva, al tener ésta “absolutamente tola autoridá llegal, democrática y política, y un mandatu de cuatro años”.

Contador Estadistiques