Día del Llibru Asturianu

Reciella presenta’l programa completu pal VII Día de la Reciella

|
Entaína

El domingu 13 d’ochobre’l Muséu del Pueblu d’Asturies va enllenase de neñes y neños y los sos familiares pa vivir una xornada llúdica y festiva en llingua asturiana dafechu. Celébrase’l VII Día de la Reciella, que va abrir la IV Entaína, carrera de relevos que simboliza la tresmisión del idioma de padres y güelos a fíos y nietos.

Les puertes van abrise a les 11 hores, cuando comience la inscripción –yá se pue formalizar al traviés d'esti enllaz –pa esta prueba pa tolos públicos con salida na bolera a les 11.30 hores. Nun va ser l’atletismu la única modalidá deportiva del día, yá que van entamase un cuadrín de fútbol (12.30 hores), xuegos de baloncestu (14 hores) y un taller-exhibición de skate (16.30 hores).

La música, como ye vezu nel Día de la Reciella, tien tamién un papel importante. Van actuar a lo llargo del día L-R y les escolines d’A Mansalva (13 hores) y va entamase una esbilla acústica de ‘Bestiariu’ (18 hores), a lo qu’hai que sumar un taller de baille en familia (17.30 hores) y la danza prima que pon pieslle a la xornada a les 19 hores.

Otres munches actividaes que se desendolquen mientres el día son un taller de reciclaxe y manualidaes (12.30 hores), un de dibuxu con Ruma Barbero (16.30 hores), un de youtuber  y otru de poesía (17 hores). Amás va presentase’l proyeutu ‘Cuentos de trazu sueltu’, de PlayPresta, a les 16 hores, momentu nel que va ponese un mercadín con productos d’Impronta, La Fabriquina, Acuto, Pintar-Pintar y Trabe.

Tamién participa nel VII Día de la Reciella, que va contar con chigre con bébora y comida, la Oficina de Normalización Llingüística de Xixón con un espaciu con actividaes propies onde atopar los materiales qu’edita pa la reciella. Esta xornada baxo'l lema ‘N’asturianu ¡presta pola vida!’, entamada por ‘Reciella. Families pol Asturianu’ cola collaboración de numberoses persones y coleutivos, ye de baldre, cola obligación de que tolos menores tean siempre acompañaos d’un adultu.

AdxuntuTamañu
Image icon Programa VII Día de la Reciella239.87 KB
Contador Estadistiques