El VIII Día de la Reciella caltién la fecha habitual, que coincide cola Selmana de les Lletres Asturianes

|

La gran fiesta al rodiu la tresmisión xeneracional del idioma va coincidir cola de les nueses lletres. ‘Reciella. Families pol Asturianu’ caltién la fecha habitual de celebración del Día de la Reciella, el primer domingu d’ochobre, que nesti añu tamién será l’últimu de la Selmana de les Lletres Asturianes al convocase l'actu académicu'l 2.

El 4 d’ochobre, si la situación sanitaria del momentu lo permite, el Muséu del Pueblu d’Asturies va enllenase d’actividaes en llingua asturiana pa neñes y neños y les sos families nuna xornada qu’abre la carrera ‘Entaína’, que simboliza’l trespasu del testigu del idioma de padres y güelos a fíos y nietos. El treslláu del XLI Día de les Lletres Asturianes, asina como de la Selmana, a la seronda, con fecha confirmada ayeri pal vienres 2 d’ochobre, fai que nesta ocasión coincidan en feches con la celebración de Día de la Reciella.

Magar que l’añu pasáu tuvo llugar nel segundu domingu del mes, la fecha tradicional venía siendo’l primer domingu d’ochobre. “Vamos entamar una seronda con milenta actividaes complementaries rellacionaes col nuestru idioma”, celebra Reciella, que yá trabaya nel lema de la octava edición y nel programa d’actividaes, que se va adaptar al contestu del momentu por cuenta la crisis sanitaria pola pandemia de COVID-19.

Contador Estadistiques