"Queremos solucionar el problema del llobu, non agravalu", afirma Pachón

El secretariu xeneral de la Unión de Campesinos Asturianos (UCA), José Ramón García Alba 'Pachón', asegura que la decapitación de La Doriga perxudica al sector "y nun ye obra de xente del campu". Esti coleutivu manifiéstase esti miércoles per Uviéu.

El cumplimientu del Plan del Llobu ye ún de los puntos que provoquen esta protesta, pero non l'únicu. "L'acotamientu, el saniamientu, el tema fiscal y la cuota lláctea son los otros asuntos polos que salimos a la cai", esplica Pachón, que denuncia'l silenciu de la Conseyería de Desarrollu Rural y Recursos Autóctonos. "Llevamos dende xineru metiendo documentos nel Rexistru y nun nos respuenden", critica.

Dalgunos "son informes xurídicos que corrixen la manera d'actuar de la conseyería", como ye'l casu de la Norma de Quemes, "que nun tien en cuenta la norma estatal modificada recién", asegura. La protesta, a la que van acudir ganaderos y llabradores de tol país, tien la salida prevista pa les 11 hores de la conseyería pa finar na Xunta Xeneral.

El Plan del Llobu

No que respeuta al Plan de Llobu, Pachón señala que "pidimos que se cumpla y que se paguen los daños reales" cola "revisión del baremu o l'afitamientu d'unes directrices a la Guardería". Nesi sen, el secretariu xeneral d'UCA apunta que los criterios "son mui suxetivos, como asocede colos acotaos", y que ye necesario solucionalo.

"El llobu causa munchísimos daños que se paguen tarde y mal", añade, pa depués refugar lo acontecío ayeri en La Doriga: l'apaición d'una cabeza de llobu decapitada colgada d'una señal de carretera. "Eso nun beneficia a naide y nun ye obra de xente del campu", asegura, pa de siguío añadir que "queremos solucionar el problema, non agravalu".