Apaez la cabeza decapitada d'un llobu colgada d'una señal cercana a La Doriga

|
Cabeza llobu La Doriga recortada

El coleutivu de vixilantes de seguridá privao AVISPA difundió la semeya pa denunciar esti fechu "condenable dafechu".

La cabeza apaeció ayeri colgada nel accesu La Doriga, nel conceyu de Salas, una imaxe y aición fuertiva "qu'amuesen la crueldá pa coles especies non cinexéticas y fauna montés por parte de delincuentes auténticos, qu'únicamente persiguen intereses bastardos y económicos de particulares nun afán de venganza descomanda y altamente peligrosa, más propia de psicópates y enfermos mentales que de ciudadanos del mundu rural". Darréu, l'Asociación de Vigilantes de la Seguridad Privada de Asturias (AVISPA) critica que l'Alministración tea "como siempre, mirando pa otru llau" queriendo "xugar a dos bandes" ensin aportar "de manera y forma definitiva una verdadera solución adoptando les midíes necesaries, tanto dende'l puntu de vista científicu como na persecución d'oficiu d'estos fechos tan llamentables".

D'igual forma, demanda a la Fiscalía de Mediu Ambiente qu'actúe "de forma urxente" pa que sobre l'autor d'esta aición "recaiga tol pesu de la llei" y finar col "terrorismu ambiental".

 

Contador Estadistiques