Pumares pide nel Plenu d'Investidura "continuar nel desendolcu de la Llei d'Usu y Promoción"

"L'intentu de reformar l'Estututu pervivió por enfotu, esfuerzu y convicción suyu y míu", dixó'l diputáu de Foro a Adrián Barbón.

"Resulta obligáu falar de la llingua asturiana, de la oficialidá de la llingua asturiana, y de la reforma del Estatutu d'Autonomía", apuntó Adrián Pumares na so primer intervención, en castellanu dafechu, na segunda sesión del Plenu d'Investidura, que s'encargó d'abrir él al formar parte del grupu mestu xunto con Cova Tomé, de Podemos, segunda en tomar la pallabra. "Soi consciente de la oportunidá perdida, y del nuesu fracasu na busca d'un amplu consensu que fixere posible la reforma del Estatutu. Sé que les simplificaciones son atractives de facer, y inclusive pueden dar réditos eleutorales, pero vusté ye tamién consciente qu'aquello de 'derechos versus impuestos' qu'acuñaron dalgunos nun se sostién", siguió.

Nesti puntu reflexonó que "tar cerca d'algamar la reforma del Estatutu sé que foi frustrante, pero sería inxusto ocultar qu'aquel intento pervivió por enfotu, esfuerzu y convicción. Esfuerzu, enfotu y convicción fundamentalmente, y lo sabe, suyu y míu. Esfuerzu, enfotu y convicción que nos llevó a ser señalaos nuna campaña infame que ye un exemplu de lo que nun se debe facer".

Por último apuntó que, "depués de que los filólogos reconozan que l'asturianu ye una llingua, dalgo que queda fuera del ámbito políticu o parllamentariu, la realidá ye que sufrimos n'Asturies una fola reaicionaria que pretende retrotraenos a tiempos peores y por suerte pasaos. Y non sólo nesti ámbitu".

Por esti movitu cree conveniente "astraenos de provocaciones y otros métodos d'escarrillar los trenes democráticos, y garantizar per aciu de l'aición de los poderes públicos autonómicos (ún de los mesmos ye esta Cámara) el desarrollu del ordenamientu xurídicu llexítimo y llexítimamente aprobáu, y poro, continuar nel desendolcu de la Llei d'Uso y Promoción. Ehí, la responsabilidá mayor ye del so Gobiernu, señor presidente; la nuesa será fiscalizar que lo faiga".