Pumares pide a Barbón que "dexe d'enredar" y "si la tien, presente la reforma xunto col articuláu"

El secretariu xeneral de Foro, Adrián Pumares, aprovechó una entruga depués de la Xunta de Voceros pa dirixise al presidente Adrián Barbón. “Pido-y que dexe d’enredar” y que “si la tien, presente la reforma xunto col articuláu y xunto colos informes xurídicos pertinentes na Xunta Xeneral”, reclamó.

Estes pallabres del diputáu vienen depués de les declaraciones del domingu en La Pola Llaviana de Barbón, cuando dixo que “nel momentu nel que'l diputáu que falta por confirmar me confirme que ta dispuestu, la reforma del Estatutu ta preparada y presentámosla inmediatamente”, en referencia a Pumares. “Nun foi sólo’l domingu, sinón a lo llargo de la selmana pasada, que foi’l Día de les Lletres”, apuntó molestu.

Recordó que “el señor Barbón fixo de la reforma del Estatutu d’Autonomía l’asuntu clave de la llexislatura. Sicasí pasaron yá trés años y nun fixo más qu’enredar. Por ello pido-y que dexe de xugar colos asturianos, que dexe de buscar chivos espiatorios y, si la tien, presente la reforma xunto col articuláu y xunto colos informes pertinentes, y que lo faiga nel sitiu que correspuende que ye la Xunta Xeneral”.

Tamién apuntó que “los mercaos nun son sitios pa facer valoraciones d’un asuntu tan relevante como ye la reforma del Estatutu d’Autonomía” y criticó una vegada más que “s’ocultaron a les persones que tábemos na mesa de negociación informes que yeren relevantes”. “Señor Barbón dexe d’enredar, de xugar colos asturianos, y dexe de facer declaraciones”, siguió.

Declaración institucional sobre la factoría de Danone en Salas

Foro presentó na Xunta de Voceros una propuesta de declaración institucional “en rellación col pieslle de Danone nel conceyu de Salas” que tuvo l’apoyu de tolos grupos parllamentarios y que se va llevar a Plenu la selmana próxima. Ésta ta a favor del cantenimientu y la continuidá de la fábrica, que de zarrar “significaría la ruina pa esti conceyu tan castigado del suroccidente”.

Pumares rexistró tamién una entruga urxente al conseyeru d’Industria, Emplegu y Promoción Económica, Enrique Fernández Rodríguez, sobre qué actuaciones ta poniendo en práutica p’algamar la continuidá de la factoría de Salas; va interpelar sobre política en materia d’infraestructures rurales y montes y, más concretamente, sobre la devolución de los montes comunales; y va pidir l’apoyu del Parllamentu pa sacar alantre una Proposición Non de Llei pa reclamar al Gobiernu asturianu y al estatal que se tenga en cuenta a la hora de determinar l’Indicador Público de Renta de Efectos Múltiples (IPREM), que se valora p’acceder a determinaes ayudes, la evolución del Salario Mínimo Interprofesional (SMI) y de la inflación.