Primer asaltu del derbi d’Asturies

|
Primer asaltu del derbi d’Asturies

L’Asturies futbolística caldia motores de cara a un enfrentamientu marcáu en coloráu dende que saliera’l calendariu. Llega’l derbi y, anque Uviéu y Sporting nun tán en bon momentu, el partíu va paralizar el país. N’Asturies.com falamos con Nacio González y Pablo Rodríguez Alonso, dos aficionaos mui reconocibles de cada equipu, pa conocer les sos sensaciones pal choque del sábadu.

Nacio Alonso, siguidor del Uviéu

¿Cómo ve al Uviéu de cara al derbi?

Veo un equipu que nun acaba d’atopase. L’entrenador nos últimos partíos ta intentando coses diferentes pero la realidá ye que quitando ratiquinos nun da una imaxe bona y los resultaos nun acompañen. Siempre s’acusó a Anquela de ser mui previsible, pero ye verdá que los resultaos y el fúbol nun lleguen independientemente del esquema o los xugadores.

¿Ye partidariu de la continuidá d’Anquela pase lo que pase mañana?

Tengo la sensación que lo que vaya ser d’Anquela y Baraja van depender muncho del resultáu de mañana. Si’l club finalmente decide cambiar d’entrenador espero que deprenda de les enquivocaciones del pasáu y nun caigamos no mesmo. El casu de Robles sustituyendo a Granero nunca lu entendí y con Generelo volvió repetise la mesma historia.

¿Considera acertada la planificación deportiva del equipu?

Hai tres meses casi tol mundo yera optimista colo que taba por vinir. Pienso qu’hai equipu pa muncho más de lo que tamos viendo. Esti añu nun creo que’l problema sea de planificación deportiva.

¿Hai ambiente de derbi n’Asturies?

Siempre hai gana de derbi. Qué pasa, que tenemos la referencia engañosa del añu pasáu. Yeren munchos años ensin ver un derbi y eso notóse. Nel 88 tamién pasó lo mesmo después de tantu tiempu sin enfrentase nun partíu oficial. Seguro que mañana nun va tar atacaú l’estadio pero ambiente sí qu’hai.

¿Qué-y paecen les condiciones de viaxe pa los siguidores del Sporting, que van repetise nel partíu de vuelta pa los del Uviéu?

Ye íncomodo, últimamente’l fúbol ta más pensao pa ver pela tele que garantir los derechos de los aficionaos que van al campu. A mi tocóme sufrilo l’añu pasáu nel partíu del Molinón. Lo que me chocá ye que l’afición del Sporting nun escosara les entraes que se mandaron pa Xixón y con eso si que nun contaba.

Un resultáu.

 La historia de los derbis vien marcada por mayoría de victories uviedines. Toi seguru que mañana nun va ser la excepción.

Pablo Rodríguez Alonso, siguidor del Sporting

¿Cómo ve al Sporting de cara al derbi?

Veo al equipu nun estáu de falta de fútbol ablayante. Llevamos meses ensin ganar fuera de casa y aunque querría ser optimista visto los partíos que tamos faciendo nes últimes selmanes ye imposible selo.

¿Ye partidariu de la continuidá de Baraja pase lo que pase mañana?

Non, nun soi partidariu de la continuidá de Baraja, pase lo que pase. Ye un entrenador que ta amosando que nun trabaya bien l'equipu, que nun tien un once base nin un sistema de xuegu. Últimamente nun fai más que dar bandazos y soi de los que creen que'un equipu tien el carácter del entrenador, y esti Sporting ye un equipu triste y apáticu.

¿Considera acertada la planificación deportiva del equipu?

Non, l'equipu nun ta bien planificao, pero eso ye una constante desde que los Fernández usurparon el club a los sportinguistes. La planificación ye culpa de Baraja, pero más de Torrecilla y enforma de quien los puso ehí. Too ello ye un pasu más d'una llaceriosa toma de decisiones que tien a esti históricu club penando per Segunda. Sacar a Fernández del Sporting ye cada vez más una urxencia.

¿Hai ambiente de derbi n’Asturies?

Siempre hai algo d'ambiente, ye obvio. Pero nun hai puntu de comparación col ambiente de los derbis en Primera. A mi los derbis en Segunda deprímenme.

¿Qué-y paecen les condiciones de viaxe pa los siguidores del Sporting, que van repetise nel partíu de vuelta pa los del Uviéu?

Les condiciones de viaxe son draconianes. Ta mui bien qu'haya seguridá y evitar qu'haya problemes, pero paezme too escesivo

Un resultáu.

Conformaríame con un 0-1.

Contador Estadistiques