Anquela y Baraja lleguen al derbi nel alambre

|
Carlos Tartiere nuevu

Una derrota nel derbi podría acelerar la destitución de dos téunicos cuestionaos. Carlos Hernández baxa principal nos azules y Lod, convocáu con Finlandia, nos roxiblancos.

Mañana, a les 20.45 hores, va comenzar a rodar el balón nel Carlos Tartiere nuevu y miles de güeyos van tar pendientes d'él. Llega'l derbi, el partíu más esperáu polos aficionaos asturianos, un choque que nesta ocasión pue tener consecuencies más allá del resultáu final.

Tanto Juan Antonio Anquela como Rubén Baraja podríen perder el so cargu en casu de derrota. Más creitu tien el téunicu andaluz del Uviéu, pero nun sumar mañana énte l'eternu rival podría acelerar el procesu.

Pa esti choque decisivu paez que va recuperar a Saúl Berjón, ensin dubia líder del conxuntu azul, anque pierde al central Carlos Hernández, xugador clave nel so esquema. Aaron Ñíguez, que nun tuvo disponible nel partíu d'A Coruña (0-4), tamién ta descartáu pa mañana.

A frayar la racha fuera de casa

El Sporting viaxa a Uviéu cola intención de vengar el 2-1 de la temporada pasada y de frayar la racha fuera de casa. Los de Baraja entá nun conocer la victoria lloñe d'El Molinón esta campaña.

El derbi ye la gran oportunidá pa los roxiblancos de dar un golpe de timón y encauzar el rumbu pa nun empezar a mirar hacia abaxo na clasificiación. Con Peybernes fuera por gripe, la única baxa importante nel Sporting ye la de Lod, anque'l finlandés nun acaba de carburar y el domingu col Málaga (2-2) salió dende'l bancu.

Una derrota conllevaría, salvo sorpresa mayúscula, la destitución de Baraja, que perdió munchu creitu pola imaxe que ta dando l'equipu esta temporada nel terrén de xuegu. L'afición yá se posicionó'l domingu y aclamó a José Alberto, téunicu del filial, nel tramu final del partíu.

L'Uviéu llega al derbi como decimosegundu clasificáu de Segunda con 16 puntos, ún más que'l Sporting, decimocuartu. Dos trayeutories que nun inviten al optimismu nes dos aficiones, como amuesa que nun vaya haber enllenu nel Tartiere pal partíu más importante del añu p'azules y roxiblancos.

Semeya obra de Celticgubrath baxo llicencia CC BY-SA 3.0.

Contador Estadistiques