Presno propón axustar la redaición presentada del artículu 4 del Estatutu

El caderalgu de Derechu Constitucional de la Universidá d’Uviéu, Miguel Ángel Presno, fixo una propuesta de redaición del artículu 4 del Estatutu d’Autonomía qu’inclúi una referencia al derechu a utilizar y conocer “les trés llingües oficiales”, ausente nel borrador presentáu pola FSA a partir de les demandes de los partíos na negociación de la reforma. José Manuel Pérez Férnandez sofita l’aportación del espertu.

Esta redaición nació de la dulda d’un usuariu de Twitter baxo’l perfil Sumiciu a partir de la noticia asoleyada por Asturies.com el vienres col testu concretu que llevaron los socialistes a la mesa de negociación celebrada esa mañana na Xunta Xeneral. La falta d’una referencia al derechu de la ciudadanía a usar l’asturianu y el gallego-asturiano, eonaviego na propuesta, que sí queda afitada nel estatutu gallegu que’l Gobiernu quixo tomar como referencia, esmoleció a dichu usuariu y treslladó la cuestión el llunes a Presno y Pérez Fernández.

El primeru respondió ayeri a la mesma con una propuesta más garantista, que’l profesor de Derechu Alministrativu de la Universidá d’Uviéu y lletráu del Tribunal Constitucional nun tardó en sofitar. Ye la siguiente:

• L’asturianu ye la llingua propia del Principáu d’Asturies y, xunto col castellanu, ye llingua oficial de la Comunidá Autónoma, de conformidá colo que s’afite nes lleis de normalización lingüística.
• El gallego-asturiano ye la llingua propia del territoriu comprendíu ente los ríos Eo y Navia y ye tamién llingua oficial de la Comunidá Autónoma, de conformidá colo que s’afite nes lleis de normalización lingüística.
• Toles persones tienen derechu a utilizar les trés llingües oficiales y los ciudadanos del Principáu d’Asturies el derechu a conoceles. Naide nun podrá ser discrimináu por razón de la so llingua.
• Los poderes públicos del Principáu d’Asturies garantizarán l’usu normal y oficial de les trés llingües oficiales y afitarán les midíes necesaries pa facilitar l’exerciciu del derechu a conoceles y usales asina como’l derechu d’accesu a conteníos y información en diches llingües nos medios públicos de comunicación del Principáu d’Asturies.

La propuesta del 2018 de Podemos y IX

Na llexislatura anterior, cuando, recoyendo’l guante de la Xunta pola Defensa de la Llingua Asturiana (XDLA) y el so ‘Proyectu 2018 pola Oficialidá’, Podemos y IX rexistraron na Xunta Xeneral la propuesta de modificación de reforma del Estatutu d’Autonomía pa incluyir la oficialidá del asturianu y del gallego-asturiano nel so ámbitu territorial cola intención d’abrir un procesu de reforma que namái tuvo’l sofitu de los sos 14 diputaos al entender la FSA que yera una cuestión a tratar na llexislatura actual –necesítense 23 pa facelo–, estos partíos yá teníen en cuenta esta cuestión. Asina, nel tercer de los trés puntos propuestos afitaben que “tola ciudadanía tien derechu de conocer y emplegar de forma llibre les llingües oficiales n’Asturies, y nenguna persona podrá ser discriminada en función de la llingua oficial que s’emplegue”.