Preséntase la torna de 'La parola fine. Diario di un suicidio' de Tatafiore

El tercer títulu de la coleición 'Calume' d'Ediciones Trabe trai al asturianu esta obra póstuma de la escritora feminista que dexó la vida nel 2009.

Xixon ta acoyendo estes dos selmanes la esposición 'La muerte, digna e ilustrada', que se pue visitar hasta'l domingu nel Centru de Cultura Antiguu Institutu. Entamada por Derecho a Morir Dignamente Asturias, en collaboración cola estaya catalana del coleutivu, vien acompañada d'una serie d'actividaes qu'inclúi, como conferencia de clausura la presentación del llibru 'La palabra final. Diariu d'un suicidiu', traducción al nuesu idioma del testu de Roberta Tatafiore que salió a la venta esta mesma selmana.

Va ser a les 19 hores mui cerca del llugar de l'amuesa, na Escuela de Comerciu, y nella va tar presente la responsable de la torna, María Antonia Pedregal; Rafael Rodríguez Valdés, direutor de la coleición 'Calume' de Trabe, qu'entantes yá tornara '1984' de George Orwell y 'La naranxa mecánica' d'Anthony Burgess; y Luis Fernández, presidente d'Asturias Laica, cola moderación de Noelia Ordieres, de DMD Asturias. La obra ye un diariu de la italiana onde cuenta la preparación del so suicidiu, planificáu y pensáu, a la edá de 66 años, que s'espublizó nel 2010.