Política Llingüística va dedicar los 290.000 euros de los PXE a reforzar les actividaes d’usu y promoción en marcha

La enmienda a los Presupuestos Xenerales del Estáu de la Chunta Aragonesista presentada nel Senáu por Compromís sobre la Carta Europea de les Llingües pa la promoción de les llingües del Estáu permite a Asturies recibir 290.000 euros, pendientes entovía d’ingresu. Política Llingüística va dedicalos a reforzar les actividaes actuales.

El votu favoratible del Partido Popular (PP) fixo que pudiera salir alantre la enmienda ‘Promoción y difusión de les llingües protexíes pola Carta Europea de les Llingües Rexonales o Minoritaries, a les comunidaes autónomes de Galicia, Asturies, Euskadi, Navarra, Aragón, Cataluña, València, Illes Balears’ previa devolución al Congresu de los PXE. Un total de 1,6 millones d’euros a repartir ente estos territorios que los diferentes responsables de Política Llingüística decidieron que se fixera de forma asimétrica pa favorecer a Asturies y Aragón, con llingües propies non oficiales y menos recursos.

290.000 euros ye la cantidá que lleven l’asturianu y el gallego-asturiano, unes perres qu’entá nun llegaron al tar el Ministeriu de Cultura y Deporte tramitando la tresferencia, según confirmen fontes de la Conseyería de Cultura, Política Llingüística y Turismu. Desconozse nestos momentos la fecha na que se recibiríen los fondos.

La Direición Xeneral de Política Llingüística yá tien decidío a qué va destinar esta importante inyeición económica. Va ser a reforzar les actividaes d’usu y promoción actuales, como son La Casina de la Traducción, los premios lliterarios y artísticos, les espublizaciones, les actividaes sociales y la collaboración colos Servicios de Normalización Llingüística, ente otres aiciones.

Na semeya, la conseyera Berta Piñán y el direutor xeneral Antón García na entrega de los Premios Lliterarios 2021 celebrada en LLABoral Centru d'Arte y Creación Industrial esti mes d'abril.