Desapaez de los PXE la partida pal asturianu y les llingües minorizaes

Elipe critica "la dexadez de los nuestros representantes en Madrid" y apunta que "namás Mulet llevantó la voz contra esta decisión" que lleva a perder 290.000 euros.

Foi una enmienda de Compromís nel Senáu, a pidimientu de la Chunta Aragonesista, a los Presupestos Xenerales del Estáu (PXE) del 2022, sofitada por, ente otros, el Partido Popular (PP), la que permitió incluyir una partida de 1,6 millones d'euros pa la "promoción y difusión de les llingües protexíes pola Carta Europea de les Llingües Rexonales o Minoritaries, a les comunidaes autónomes de Galicia, Asturies, Euskadi, Navarra, Aragón, Cataluña, València, Illes Balears”. Una cantidá que se repartió depués de manera asimétrica por alcuerdu de los responsables de política llingüística d'estes ochos comunidaes autonómes pa favorecer al asturianu, al gallego-asturiano y al aragonés, los que nun tienen calter d'oficiales, polo qu'Asturies y Aragón recibieron 290.000 euros caúna, mentes que les restantes quedaron con 170.000.

El Proyeutu d'esti añu pal viniente, sicasí, nun cuenta con esta partida, lo que lleva al senador valencianu Carles Mulet a llamentar que "desapaeza de les cuentes" a pesar de la "gran acoyida que tuvo polos xestores responsables de política llingüística". Pide al Gobiernu que medite sobre esta decisión y apunta que "nun pue ser que se destinen 1.100 millones pa la economía de la llingua y nun se concrete una partida específica pa les llingües non oficiales, qu'esisten nel nuesu Estáu y que precisen d’una financiación cola que facer polítiques llingüístiques, de conservación, promoción y ayuda a la celebración d’actividaes".