Política Llingüística pon a disposición de la ciudadanía'l mapamundi colos países n'asturianu

Pue recoyese na propia direición xeneral, previa solicitú, y en dellos servicios de normalización.

Una vegada fecha la distribución peles escueles del país, la Direición Xeneral de Política Llingüística pon a disposición de la ciudadanía y de les instituciones interesaes el mapamundi colos nomes de los países y capitales n'asturianu, segundu que s'edita dende'l Gobiernu depués del asoleyáu pola Axencia Asturiana de Cooperación al Desarrollu na primer década del sieglu. Ésti cuenta con un formatu de 70 x 100 cm y sigue la proyeición Hobo-Dyer, que nun tien distorsión norte-sur nin este-oeste y muestra'l tamañu relativu de los estaos d’alcuerdu cola superficie de caún, dando una perspeutiva más real que los mapamundis clásicos.

La xente interesao en tener un exemplar del mesmu ha de solicitalo na direición de corréu electrónicu dxpoliticallinguistica@asturias.org pa depués poder recoyelu na sede la direición xeneral, na propia Conseyería de Cultura, Política Llingüística y Turismu asitiada na cai Eduardo Herrera 'Herrerita' d'Uviéu. Tamién tarán disponibles nos servicios de normalización llingüística de Xixón, Avilés, Corvera, Mieres, Ḷḷena, Cangas del Narcea, Cabu Peñes, Grau y Candamu, y la 'Comarca de la Sidra'.