Una visión del mundu n'asturianu. La Direición Xeneral de Política Llingüística ta acabante d’editar un mapamundi de proyeición Hobo-Dyer colos diferentes países y les sos respeutives capitales cola so forma asturiana –siguiendo la propuesta de nomes de l’Academia de la Llingua Asturiana (ALLA)– pa repartir n’escueles y instituciones.
Con un formatu de 70 x 100 cm y una tirada de mil exemplares, permite conocer d’una güeyada la situación xeográfica de los estaos y cómo se nomen nel nuesu idioma, asina como les sos capitales. “L’oxetivu ye que’l mapa resulte d’utilidá tanto pa docentes como pal alumnáu nel procesu d’enseñanza y aprendimientu de la llingua asturiana, y qu’anime a toles persones a descubrir el mundu dende la so llingua y cultura propies”, apunten dende Política Llingüística.
Amás aporta una visión más real del mundu al editase cola proyeición Hobo-Dyer, que nun tien distorsión norte-sur nin este-oeste y muestra'l tamañu relativu de los países d’alcuerdu cola superficie de caún, dando una perspeutiva más real que los mapamundis clásicos. El cartafueyu normativu ‘Nomes de los países del mundu y de les sos capitales y xentilicios’ (2010) de l’ALLA foi la base p’afitar los diferentes topónimos.
La edición d’esti mapa del mundu n’asturianu, que tamién muestra los puntos más altos del mundu y de cada continente y el puntu más baxu, enmárcase dientro de les iniciatives de promoción de la llingua asturiana y financióse con fondos procedentes del Ministeriu de Cultura y Deporte destinaos a sofitar l’espardimientu de les llingües protexíes pola Carta Europea de les Llingües Rexonales o Minoritaries. Amás d’a escueles, el planu va llegar a los servicios de normalización llingüística y a instituciones culturales y académiques.
Adxuntu | Tamañu |
---|---|
![]() | 640.75 KB |