Política Llingüística actualiza la campaña de matriculación na materia de Llingua Asturiana: ‘Ye nuestra, ye pa ti’

|
Campaña matriculación 'Yo apúntome'

Los miembros de la comunidá educativa asturiana van ser protagonistes de la campaña nueva de la Conseyería de Cultura, Política Llingüística y Turismu, p’animar a la matriculación na materia de Llingua Asturiana y d’Eonaviego. Baxo’l lema de ‘Ye nuestra, ye pa ti / É nosa, é pra ti’ sustitúi la de #Apúntate y entama cola emisión d'anuncios en RTPA.

Esta selmana principió la emisión de les siete pieces, realizaes por José Antonio Braña, que se van emitir tanto na televisión como na radio públiques hasta’l 15 de xunetu. Cinco son n’asturianu y dos en gallego-asturiano y en caúna d'nelles preséntense trés intervenciones d’alumnes y alumnos, families, profesoráu o persones que cursaron estes asignatures na so etapa escolar.

En total entrevistáronse a más de 30 persones de dellos puntos del país, que respuenden a una de les entrugues siguientes: “¿Por qué escoyéis Llingua Asturiana / Eonaviego? (families); ¿Por qué te presta aprender Llingua Asturiana / Eonaviego? (alumnáu); ¿Qué-yos aporta a los neños y neñes l’asignatura de Llingua Asturiana / Eonaviego? (profesoráu); y ¿Qué t’aportó Llingua Asturiana / Eonaviego na ESO y el Bachiller?”.

La campaña ‘Ye nuestra, ye pa ti / É nosa, é pra ti’, destinada a les etapes de Primaria, Secundaria y Bachilleratu, sustitúi a la de #Apúntate, entamada nos dos cursos pasaos, y va complementase nes selmanes vinientes col unviu a los centros educativos de carteles y folletos pa repartir ente l’alumnáu y les families y la puesta en marcha d’una páxina web que va recoyer los vídeos grabaos y tola información rellacionada.

Na semeya, cartelu nel xixonés Colexu Públicu El Llano de la campaña entamada nel 2018.

Contador Estadistiques