La campaña de matriculación en Llingua Asturiana madruga esti añu baxo’l lema ‘Nun-y deas más vueltes’

La Conseyería de Cultura, Política Llingüística y Turismu adelantó esti añu más que nunca l’entamu de la campaña de matriculación en Llingua Asturiana y Gallego-asturiano, una demanda vieya de los docentes y centros que víen como’l material llegaba tarde o col tiempu xustu. ‘Nun ye días más voltas / Nun-y deas más vueltes’ ye’l lema escoyíu.

Ésti sustitúi a ‘Ye nuestra, ye pa ti / É nosa, é pra ti’, l’emplegáu de cara a esti cursu vixente –y que se caltién como frase final nésti–, una campaña qu’entamó metanes mayu, mes y mediu más tarde que nesta ocasión. La Direición Xeneral de Política Llingüística yá principió col repartu de los dípticos y cartelos nes escueles y institutos, y, al igual que nel 2022, van emitise na RTPA y divulgase en redes sociales espacios publicitarios con testimonios personales d’alumnos, families y profesores, toos ello disponibles nesta páxina web.

Con ‘Nun ye días más voltas / Nun-y deas más vueltes’ –dando prioridá nesta ocasión a la llingua del occidente, anque hai material específicu pa cada idioma– “la campaña incide en que la conocencia de les llingües propies d’Asturies ye un derechu del alumnáu qu’amás tien munches ventayes pal so desenvolvimientu personal y académicu, dende la meyora na competencia comunicativa hasta una autoestima mayor, amás del fomentu de la sensibilidá escontra la diversidá cultural”. La Conseyería d’Educación yá unvió'l correspondiente boletín informativu a les direcciones de los centros y va abrir los plazos de solicitú del día 24 hasta’l 5 de mayu, mentes que la matrícula ha formalizase, nel casu de les escolines y escolinos de Primaria, del 20 al 27 de xunu, y de les de Secundaria y Bachilleratu, del 3 al 14 de xunetu.