Podemos-EQUO lleva al Plenu de payares la falta d'usu del topónimu ‘Xixón’ por parte del Conceyu

|
Laura Tuero

“Poco o nada-y importa la nuesa llingua a esti equipu de gobiernu nin cuando la defende pa que tea presente nos eventos, financiaos amás con dineru públicu, como marca’l Plan de Normalización”, asegura Laura Tuero, vocera de Podemos-EQUO Xixón. Va entrugar mañana en Plenu sobre l’usu del topónimu ‘Xixón’, ausente nel tornéu de tenis ATP 250 o nes felicitaciones navidiegues.

En concreto va preguntar na sesión de mañana si l’equipu de gobiernu tien previstes midíes “pa que se normalice l’usu del topónimu ‘Xixón’ en tolos eventos organizaos o financiaos pol Ayuntamientu”. Pon como exemplu últimu más llaceriosu’l Gijón Open, tornéu de tenis ATP 250 celebráu n’ochobre, onde “nun tuvo nenguna presencia, nin na páxina web, nin en redes sociales, nin na publicidá en medios de comunicación, nin nos trofeos”, a lo qu’hai que sumar la desapaición del logu ‘Xixón’ esos díes del Palaciu de Deportes, onde ye visible, “al paecer por una decisión unillateral de la Federación Española de Tenis”, responsable de la competición, “a pesar de que l’Ayuntamientu de Xixón financiaba con 1,2 millones la organización d’esti tornéu”.

Nos díes últimes tamién pudo vese la presencia del mensaxe ‘Navidad en Gijón’ nes rotondes d’entrada principales a la villa dientro de la illuminación navidiega que ta instalándose pa prender el 2 d’avientu, col asturianu ausente sacante una figura grande col topónimu ‘Xixón’ n’El Parchís hermana d’otra con ‘Gijón’ en Campu Valdés. “El PSOE en Xixón estancó l’usu de la toponimia asturiana”, critica Tuero, “mentes que’l presidente Barbón diz defender na Xunta Xeneral la nuesa llingua”.

“Cuando aprobamos, nel plenu d’agostu de 2020, el III Plan de Normalización Llingüística diximos que yera cuasi idénticu al que s’aprobara nel mandatu anterior. En parte ye asina porque tien midíes que requieren continuidá, pero en parte tamién tuvimos qu’aprobar cuatro años depués un testu mui asemeyáu porque lo que s’aprobara daquella nun se cumplió”, siguió la edil, que camienta que “esto nun ye serio, por eso pidimos al equipu de gobiernu que cumpla colos plazos y aplique al cien por cien lo que s’aprueba pa que Xixón seya un conceyu billingüe y l’exemplu pa otros conceyos d’Asturies na promoción del asturianu”.

Contador Estadistiques