Podemos Asturies presenta una proposición parllamentaria pa llevar la oficialidá al Estatutu d’Autonomía

“Too depende de la voluntá política” insisten Rafa Palacios y Sofía Castañón.

Podemos Asturies va llevar al próximu plenu del Parllamentu asturianu la reforma del Estatutu, al traviés d'una proposición non de llei, que contemple la oficialidá de les llingües propies d’Asturies, ente otres cuestiones de soberanía. Asina anunciaron esti miércoles, la coordinadora autonómica de la formación morada, Sofía Castañón, y el voceru parllamentariu, Rafael Palacios, nuna rueda de prensa na que falaron n’asturianu.

Castañon esplicó que “consideramos que ye agora’l momentu, d’énte la incertidume, reforzar la soberanía”. Esta iniciativa parllamentaria “implica qu’hai que falar sí o sí de la reconocimietnu de les llingües propies d’Asturies”. La coordinadora de Podemos ta convencida de que una vez que s’abra el procesu “va siguir p’alantre” y que “tien que servir pa blindar tou tipu de derechos” que yá tan n’otros testos autonómicos.

Coles mesmes, señaló que “ye’l Gobiernu asturianu el que tien la responsabilidá de traer la reforma d’esi testu a la Xunta Xeneral pa poder facer el debate parlamentariu con tresparencia absoluta”. Pel so llau, Rafael Palacios, indicó que la reforma de la Carta Magna asturiana “tien que garantizar que toles persones d’Asturies vean reconocíu’l so derechu a usar, ensin restricciones, cualesquier de les llingües propies d’Asturies” al traviés de la “capacidá d’autogobiernu”.

La proposición non de llei que Podemos va llevar al próximu plenu encamienta al Conseyu de Gobiernu a rexistrar una propuesta de reforma del Estatutu "que contemple, ente otres cuestiones, la oficialidá del asturianu y del gallego-asturianu. Porque va siendo hora de que podamos falar de los conteníos d'esta reforma estatutaria".

Amás, remarcó que quien “tien la responsabilidá de traer esta propuesta de reforma son el Gobiernu d’Asturies y la FSA. Y, más tovía, depués de la so declaración d’asturianismu políticu y compromisu col país” que s’escenificó nel so congresu del pasáu sábadu. A la entruga de si nesti añu podría tar la oficialidá en marcha, dambos representantes políticos contesten que “too depende de la voluntá política”.