La PNL de Podemos pa encamentar al Gobiernu a presentar una propuesta de reforma del Estatutu queda ensin apoyos

Los partíos dieron esti miércoles nel Plenu de la Xunta Xeneral otru portazu a la posibilidá d’encarar una reforma del Estatutu d’Autonomía nesta llexislatura. La Proposición Non de Llei presentada por Podemos al respeuto nun contó con apoyu nengún y les espeutatives d’oficialidá siguen pasando poles eleiciones de mayu del 2023.

Rafael Palacios encargóse de presentar la iniciativa, que nun se centraba namái na oficialidá: "la Xunta Xeneral del Principáu d'Asturies encamienta al Conseyu de Gobiernu a rexistrar una propuesta de Reforma del Estautu d’Autonomía del Principáu d’Asturies que contemple, ente otres cuestiones y materies, la oficialidá de toles llingües propies d’Asturies”. Asina, defendió que la norma “requier una revisión que permita reformar dalgún de los sos artículos y incorporar demandes contemporánees de la sociedá asturiana” pa “ampliar la capacidá d’autogobiernu d’Asturies”.

El diputáu de Podemos citó la incorporación de ferramientes alministratives y llexislatives p’aumentar los recursos a disposición del Gobiernu y la Xunta Xeneral, como'l decretu llei; la competencia pa convocar eleiciones; el refuerzu de les señes d’identidá asturianes; l’afitamientu de derechos sociales, como la oficialidá; y la supresión de los aforamientos, ente otros. “La reforma del Estatutu d’Autonomía ha garantizar que toles persones d’Asturies vean reconocíes el so derechu a usar ensin restricciones les sos llingües propies”, afirmó.

Les postures

“Ye difícil siguilu, polo menos pa min”, principió Ignacio Blanco la so intervención pol usu del asturianu por parte de Palacios. El diputáu de VOX caltuvo’l discursu habitual del so partíu al respeuto del idioma y acusó a Podemos de pretender namái la oficialidá cola reforma estatutaria.

Adrián Pumares avanzó mientres el so discursu el votu negativu magar que “en dalguna cuestión toi d’alcuerdu con vusté”. “La dinámica de negociación namái favoreció al Partido Socialista, porque negociamos en base a supuestos documentos que se diben ellaborar y que nunca hebo sobre la mesa”, apuntó’l secretariu xeneral de Foro, que criticó que “la política llingüística ye la mesma que la d’otros gobiernos, como’l de Javier Fernández o’l de Vicente Álvarez Areces”.

“Creo que cai nun error na so Proposión Non de Llei”, siguió, “la cuestión llingüística ye la única reforma que vusté cita na parte dispositiva”, rescamplando darréu la necesidá pal país “d’otru tipu de reformes que sí citó na esposición de motivos”. “Comparto con vusté que tolo relativo cola reforma del Estatutu plantegóse d’aquella manera y que nós fuimos a meses de negociaciones nes qu’inclusive nos ocultaron a los partíos políticos qu’acudimos con bona fe documentos en caxones rellacionaos cola oficialidá de la llingua asturiana que llueu amás foron utilizaos d’una manera chambona”, espresó’l llavianés, que fixo autocrítica afirmando que foi un error nun forzar enantes al Gobiernu “a que nos presentase una propuesta de reforma del Estatutu d’Autonomía a partir de la que negociar y debatir”.

Izquierda Xunida (IX) tamién confirmó previamente’l ‘non’ a la PNL “precisamente porque creemos firmemente na necesidá d’abordar una reforma del Estatutu d’Autonomía qu’incorpore la oficialidá del asturianu. Tamos convencíos de que más pronto que tarde esa necesidá va abrise pasu hasta algamar la mayoría de 27 escaños que l’Estatutu esixe y que sabemos qu’agora nun esiste”. “Creemos qu’esta iniciativa nun ye útil nesti momentu pa llograr l’oxetivu que toos queremos, que ye la oficialidá. Creemos que ye contraproducente porque nos va llevar a una derrota nueva y eso alimenta a los que quieren impedir esa oficialidá”, espuso Ángela Vallina.

La diputada criticó tamién la postura del PP asturianu col idioma faciendo referencia al “billingüismu cordial” que defendió’l so presidente estatal Alberto Núñez Feijóo, que comparó “cola oficialidá amable” d’Adrián Barbón, y valoró un posible futuru cambiu de postura del partíu conservador. Caltuvo la mesma de siempre Sergio García, de Ciudadanos, que negó que hubiera “asturianos oprimíos que nun puedan espresase” y animó a la FSA a que convirtiera les eleiciones del 2023 “en plebiscitaries sobre oficialidá sí o non”.

“Tienen ganes de que-yos vuelvan a engañar”, apuntó’l popular Álvaro Queipo en referencia a la postura socialista cola reforma, calificando la negociación de “falsa, a puerta zarrada ensin dar información a la metá de la Cámara sobre lo qu’ellí se taba negociando”. “A lo meyor pretendíen que too saliera como salió”, aseguró’l secretariu xeneral del PP, qu’añadió “equí nun hebo voluntá de negociar nada, namái marketing”.

"Nun ye ésta la propuesta", diz el grupu socialista

Noelia Macías, pela so parte, calificó la propuesta de Podemos de “estemporánea” y confirmó que “los socialistes asturianos tenemos claro que depués de 40 años llegó’l momentu de reformar el nuesu Estatutu d’Autonomía pa modernizalu”. “Somos un partíu seriu, que cumplimos colos nuesos compromisos, y por eso punximos enriba la mesa la propuesta de reformar p’avanzar nel nuesu autogobiernu, impulsar reformes y reconocer la oficialidá de les llingües propies d’Asturies”, añadió.

“Nun sabemos a qué obedece esta propuesta”, señaló darréu depués de dirixise a Palacios apuntando que “vusté sabe, porque tuvo nes negociaciones, que nun foi posible l’alcuerdu pa los 27 votos imprescindibles pa la reforma del Estatutu, incluyendo la oficialidá”. Pa finar, criticó la propuesta fiscal de la formación morada pa desbloquiar la negociación “qu’agradó fondamente a la derecha d’esti hemiciclu” al nun presentala previamente p’algamar un alcuerdu coles “fuercies polítiques d’izquierdes que tamos a favor de la oficialidá ensin pone-y un preciu”.

“Si vustedes agora quixeren facer una propuesta pa comprobar si esiste apoyu de les fuercies polítiques necesaries pa tener 27 votos a favor de la oficialidá nun sería esta propuesta, sería otra que buscase de manera clara’l comprobar quién ta a favor de la oficialidá y si hai fuercies polítiques que l’apoyen y sumen los necesarios 27 votos. Taríemos falando d’apoyu a la oficialidá ensin condiciones y ensin preciu, porque hebo'l que punxo preciu a la oficialidá y vusté nun diz nada na so propuesta”, llamentó Macías.