Piñán va lleer el pregón de la XXVI Fiesta de la Oficialidá de la Llingua Asturiana de Bimenes

Yá s’avera’l 5 de xunetu, la fecha na que’l Conceyu de Bimenes declaró per primer vegada nel 1997 la oficialidá de la llingua asturiana, que se vien conmemorando dende entós con una folixa. L’ayuntamientu yerbatu yá tien preparada esta edición especial de la Fiesta de la Oficialidá polos 25 años, na que va lleer el pregón la conseyera Berta Piñán.

Llueu de dos años con conmemoración, pero ensin folixa, Bimenes recupera la normalidá pa ña Fiesta de la Oficialidá. Asina va haber conciertos, actividaes per selmana y la Xira Popular del sábadu 2 de xunetu, día grande de la celebración.

Esa xornada va contar cola presencia de Piñán, conseyera de Cultura, Política Llingüística y Turismu, encargada de lleer el pregón en Martimporra al meudía, na plaza de Miranda de l Douro, cuando tamién van intervenir l’alcalde Aitor García Corte y la primer edil del territoriu portugués hermanáu con Bimenes que da nome al sitiu, Helena Barril, que debuta na Fiesta de la Oficialidá depués d’años d’asistencia del so antecesor, Artur Nunes. A les 12.30 hores va entamase la Danza de la Oficialidá y un pasucais del Grupu Folklóricu Los Yerbatos y los mirandeses Pauliteiros.

Dambes formaciones tamién van actuar en Santuyano, na plaza’l polideportivu Melanio Asensio, onde van treslladase los actos previos en casu de mal tiempu. Nesi llugar va celebrase a les 14.30 hores la Xira Popular na que tolos participantes pueden llevar la xinta de casa, non asina la bébora, polo que s’habilita un serviciu de bar –p’acutar siella hai que llamar al númberu de teléfonu 985.70.00.04 enantes del miércoles 29–.

Los Gascones van ambientar la tarde, cuando se va celebrar a les 17 hores el VII Concursu d’Escanciadores de Bimenes. Pa zarrar, a les 23 hores van tener llugar los conciertos, con Figos de Tuna y Dixebra, banda que ta presentando pel país el so discu-llibru ‘Ente la niebla’.

Nueche en Danza y Selmana Cultural

La fiesta, sicasí, va arrancar el día enantes nesi mesmu llugar, cola celebración d’una Nueche en Danza. A les 21 hores Montse Rico va poner un taller de baille y a les 22.30 va entamar la folixa cola presencia de Los Yerbatos, Cantaruxare y Pandereteres de Fitoria.

Amás, de llunes a xueves va entamase la Selmana Cultural pola Oficialidá, con una visita guiada’l llunes a les 17 hores pela Sienda los Molinos a cargu d’Ánxel Antón García –hai qu’acutar plaza nel teléfonu 985.70.00.04 n’horariu de mañana–, un alcuentru cola escritora Blanca Fernández el martes (19.30 hores, Casa Conceyu), la charra ‘La hestoria de la llingua asturiana en 60 minutos’ por Inaciu Galán el miércoles (19.30 hores, Casa Conceyu) y un taller d’iniciación a la cuatriada de la Peña Bolística Rozaes el xueves a les 16 hores na bolera municipal de Rozaes –tamién hai que confirmar asistencia nel númberu del Ayuntamientu–.

Na semeya, Piñán nuna visita'l mes pasáu al Muséu de la Minería con motivu de la celebración de Día Internacional de los Museos.