Arranca la Selmana Cultural pola Oficialidá de Bimenes

Va haber actividaes tolos díes hasta'l sábadu, cuando se celebra la Fiesta de la Oficialidá.

Una salida guiada pela Sienda los Molinos va abrir esta tarde la Selmana Cultural pola Oficialidá qu'entama'l Conceyu de Bimenes. Ánxel Antón García va encargase de dar les esplicaciones a les persones apuntaes a esta ruta que va partir a les 17 hores de la Casa Conceyu.

Mañana la yerbata Blanca Fernández, ganadora por 'No que cinca los seres de lleenda' del I Premiu Enriqueta González Rubín de narrativa moza, creáu l'añu pasáu pola Conseyería de Cultura, Política Llingüística y Turismu dientro de los Premios Lliterarios, va celebrar un alcuentru con llectores a les 19.30 hores nel salón de plenos de la Casa Conceyu. L'actu entamáse dientro del ciclu 'Autores nel Camín'.

Va siguir la Selmana Cultura'l miércoles, nel mesmu llugar y a la mesma hora, cola charra ‘La hestoria de la llingua asturiana en 60 minutos’ a cargu d'Inaciu Galán, nesti casu dientro del programa 'Asturies, Cultura en Rede'. Va completar esta primer parte de la programación un taller d’iniciación a la cuatriada por parte de la Peña Bolística Rozaes el xueves a les 16 hores na bolera municipal de Rozaes –hai qu'acutar plaza nel númberu de teléfonu 985.70.00.04 peles mañanes–.

Nueche en Danza y el día grande

El sábadu va tener llugar el gran día, la Fiesta de la Oficialidá de la Llingua Asturiana, pero'l vienres tamién va haber actividá en Santuyano, na plaza’l polideportivu Melanio Asensio. A les 21 hores Montse Rico va poner un taller de baille y a les 22.30 va entamar el 'Bimenes en Danza!' cola presencia de Los Yerbatos, Cantaruxare y Pandereteres de Fitoria.

La llectura del pregón al meudía siguiente por parte de la conseyera Berta Piñán na plaza de Miranda de l Douro, en Martimporra, va abrir la gran folixa que conmemora la declaración d'oficialidá de Bimenes nel 1997, actu históricu del que se cumplen 25 años. Folclor, la Xira Popular –p’acutar siella ye necesario llamar al númberu del Conceyu enantes del miércoles– en Santuyano, el concursu d'echadores de sidra y, pa finar, un conciertu de Figos de Tuna y Dixebra, componen el programa de la fiesta.

Na semeya, camiseta conmemorativa del 25 aniversariu de la declaración de la oficialidá y bolsa de tela que yá tán a la venta na Casa Conceyu y que se van poder mercar na fiesta'l vienres y el sábadu.