Piñán anuncia’l proyeutu Faladera de formación non reglada n'asturianu p’adultos pa cubrir “la demanda d’aprendimientu”

Esti miércoles la Comisión de Facienda ta celebrando la comparecencia informativa de Berta Piñán pa esplicar les cuentes del so departamentu nel Proyeutu de Llei Presupuestos Xenerales del 2022. Ente les novedaes rescampló la creación de la iniciativa Faladera de formación non reglada p’adultos pa cubrir “la demanda qu'hai anguaño d’aprendimientu d’asturianu y eonaviego”.

“La mayor novedá d’esti capítulu ye una llinia nueva, dotada de 86.000 euros, pal exerciciu 2022, destinada a la Federación Asturiana de Conceyos. Búscase con ella poner en marcha’l proyeutu Faladera de formación non reglada pa persones adultes en collaboracion coles corporaciones llocales y los servicios de normalización llingüística que cubra a lo llargo de tola xeografía asturiana la demanda qu’hai anguaño de d’aprendimientu non regláu d’asturianu y eonaviego”, esplicó la conseyera de Cultura, Política Llingüística y Turismu.

Tamién esplicó que los 150.000 euros a la Sociedá Pública de Xestión y Promoción Turística y Cultural del Principáu d’Asturies destínense pa incluyir dafechu’l circuitu Autores nel Camín, “puestu en marcha esti 2021 con abondu ésitu”, nel programa ‘Asturies, Cultura en Rede’ que xestiona. Esta empresa pública, recordó, tamién participó na organización de la Selmana de les Lletres Asturianes “y queremos que siga esta collaboración ampliándose a la gala final del Premiu Camaretá al Meyor Cantar y a la puesta en marcha d’una feria del llibru y del discu n’asturianu”.

Sigue l’ameyoramientu del Eslema

Na so intervención Piñán cifró’l presupuestu dedicáu a la promoción del asturianu en 2.205.441 euros, un 6,17 por cientu más que nes cuentes actuales, y aseguró que “siguimos apostando pola tresversalidá na política llingüística”. La conseyera tamién comentó que sigue l’ameyoramientu del traductor en llinia, l’aumentu de 10.000 euros de la dotación a l’Academia de la Llingua Asturiana o la medría nun 10 por cientu de les ayudes a medios de comunicación pa la normalización del idioma y nun 15 a la producción editorial.

N'otres cuestiones d'otres direiciones xenerales, citó una partida de 100.000 euros pa la celebración del Añu d'Asturies nel Festival Interceltique de Lorient, o de 75.000 euros pa la presencia d'escritores asturianos na Frankfurter Buchmesse, "el principal certame lliterariu d'Europa", que nel 2022 va tar dedicáu a España.

Na semeya, Piñán, segunda pela derecha na primer filera xunto colos miembros del so equipu.