"Nun vengo a que me dean clases d'asturianu", protesta Blanco

El diputáu de VOX dixo nun entender 31 pallabres del discursu de Berta Piñán.

Enantes del entamu de la Comisión de Facienda, cuando se solicita la comunicación de sustituciones nos grupos, Ignacio Blanco aprovechó pa facer un "primer inciso". "Me gustaría solicitar que en el caso de que se vaya a hacer la intervención en asturiano o en llingua, que respeto plenamente, se me pueda hacer adelantar una transcripción en español para evitar problemas de comprensión. No voy a estar media hora apuntando palabras o expresiones que no entiendo para finalmente revisarlas", solicitó.

"Al final de la intervención esta mesa y esta presidencia valorará si hai que facer dalguna declaración, como ta alcordao", respondió darréu en castellanu Beatriz Polledo, presidenta de la Comisión de Facienda. Como ye vezu, la responsable de Cultura, Política Llingüística y Turismu, que comparecía pa informar de les cuentes del so departamentu, usó l'asturianu, polo que, al terminar, Blanco quixo intervenir, momentu nel que la popular ufrió-y la posibilidá facilita-y tiempu si quixera entrugar por daqué que nun entendiera.

"Como nun comparto la dinámica que s'estableció equí pa que sólo sía suxetu de derechu la conseyera de Cultura, quiero que conste qu'hebo pallabres que nun entendí nel minutu 29.23, 28.45, 28.24, 27.21...", asina hasta llegar a 31, enumeró en castellanu Blanco. "Nun vengo equí a que me dean clases d'asturianu. Entendí una parte del discursu, una pequeña parte nun la entendí, y creó que nuna cámara llexislativa tendríamos de tener el derechu tolos diputaos d'entender completamente'l discursu de 30 minutos de llargor", esixendo a la conseyera'l doble trabayu de tener que tornar al castellanu'l testu que lleó na so intervención.