Otru non: esti Gobiernu estatal tampoco nun quier reconocer la especialidá docente d'asturianu

La ministra d'Educación, Formación Profesional y Deportes, Pilar Alegría, nun ta dispuesta a facer los cambios necesarios, énte la falta d'oficialidá, p'atender una demanda histórica.

El desplazamientu ayeri a Madrid de Lydia Espina, conseyera d'Educación, tenía como oxetivu presentar a la socialista dalgunes de las principales llinies de xestión del so departamentu, especialmente la creación de la rede pública, autonómica y gratuita de 0 a 3 años Les Escuelines, pero tamién la estratexa de detección d’altes capacidaes, nel so segundu añu de desendolcu. Sobre lo primero, solicitó al Gobiernu estatal cuasi cuatro millones adicionales pa financiar l’apertura de escuelines nueves nel 2025 pa completar asina la so estensión sobre’l territoriu y reducir les llistes d’espera cola creación de más places, perres que vendríen de fondos sobrantes del ‘Mecanismo de Recuperación y Resiliencia (MRR)’.

“La xunta finó falando d’una prioridá total del Gobiernu d’Asturies, que ye meyorar la enseñanza del asturianu nes aules”, solicitando otra vuelta la especialidá docente de Llingua Asturiana y Gallego-asturiano “pa tener a más 300 compañeros y compañeres estabilizaos y con unes condiciones de trabayu meyores”, aseguró Espina. “Ello volvió dicime que, mui al so pesar, porque lo llamenta, mientres nun tengamos la oficialidá del asturianu nun tendremos especialidá docente”, esplicó.

Una posición mui rebatida pola propia comunidá educativa, instituciones y coleutivos que trabayen pol idioma, que consideren que la creación de la especialidá docente sería posible con una modificación de los reales decretos y que la falta d’oficialidá nun lo impide al haber especialidá de llingües non oficiales como l’inglés o l’alemán.

Na imaxe Espina; Alegría; el secretario d'Estáu d'Educación José Manuel Bar; y la direutora xeneral d'Evaluación y Cooperación del ministeriu, Mónica Domínguez García, nun momentu de la xunta. Semeya obra de Carlos Pina.