L'Academia considera que la solución más efeutiva pa la creación de la especialidá d'asturianu ye la oficialidá

La institución académica reaiciona a la negativa nueva del Gobiernu estatal de coalición de modificar los reales decretos d'especialidaes.

L'Academia de la Llingua Asturiana (ALLA) posicionóse esta mañana al traviés d'un comunicáu sobre'l refugu de la ministra d'Educación, Formación Profesional y Deportes, Pilar Alegría, de crear de la especialidá docente de Llingua Asturiana y Gallego-asturiano. Nel mesmu agradez, en primer llugar, "la iniciativa –continuada nel tiempu– del Gobiernu d’Asturies y el so enfotu en llograr esa midida llegal, magar les socesives respuestes negatives de l’alministración del Estáu sofitándose nel fechu de que l’asturianu nun ye una llingua oficial y plantegando como alternativa que’l problema se solucionare n’Asturies n’aplicación del art. 3.2 de la Constitución Española".

Darréu recuerda que "la titulación universitaria esixida pa la docencia d’asturianu en primaria y secundaria tien agora mesmo les mesmes condiciones académiques que’l restu d’especialidaes y ye asina que tal titulación ta reconocida pola Axencia Nacional d’Evaluación de la Calidá y Acreitación (ANECA) del Gobiernu del Estáu", pero "esti sector docente (de más de 400 persones) nun puede participar nin en concursos de tresllaos nin en convocatories oficiales d’oposiciones p’algamar la condición de funcionarios docentes d’asturianu".

"A lo llargo de les décades caberes foron munches les iniciatives que demandaron la reforma de los respeutivos decretos del Ministeriu d’Educación: Gobiernu d’Asturies, Xunta Xeneral del Principáu, Conseyu Escolar del Estáu, Comisión d’Educación del Congresu de los Diputaos… Non obstante, toes elles toparon siempres col pilancu fundamental de la non oficialidá", sigue'l comunicáu, qu'apunta darréu "qu’ésta y otres situaciones de discriminación llingüística n’Asturies podríen iguase en dalgunos casos con voluntá política, pero l’ALLA entiende que namái hai una solución efeutiva pa finar colos problemes del asitiamientu llegal del asturianu y de la llingua eonaviega: el cumplimientu de la previsión constitucional, esto ye, la declaración d’oficialidá nel Estatutu d’Autonomía".

Poro, l'ALLA pide a les fuerces polítiques " con representación parllamentaria na Xunta Xeneral que, d’una vegada, s’apauten ente elles pa consensuar el modelu d’oficialidá constitucional qu’Asturies necesita. Llueu de más de cuarenta años d’autonomía esta demanda nun ye non solo una cuestión inesplicablemente pendiente, sinón una anomalía democrática qu’Asturies nun pue permitise. Entiende que "les fuerces polítiques democrátiques y constitucionalistes (PSOE, PP, Convocatoria por Asturies, Podemos y Foro) tienen la pallabra y, otra vuelta, la oportunidá de nun defraudar a los asturianos y asturianes".